Dünya bankının (DB) "Azərbaycanın institusional quruculuğuna texniki yardım" (IBTA-2) ücrə ikinci layihəsi çərçivəsində kreditin təkrar strukturlaşdırılmasına dair memorandum bankın direktorlar Şurasına baxılmaq üçün təqdim edilib. Bu barədə Trend ə bankın Bakıdakı nümayəndəliyindən bildirilib. Kreditin qənaət olunmuş 3,56 mln. SDR ($5,13 mln.-$5,14 mln.) həcmində vəsaitləri "quş qripi" ilə mübarizə məqsədilə həyata keçirilən tədbirlərə yönəldiləcək. Bu layihənin hazırlanması üçün DB-nin kənd yerlərinin inkişafı üzrə baş mütəxəssisi Maurizio Guadagninin başçılıq etdiyi missiyası Bakıda olub. Missiya martın 11-də öz işini başa çatdırıb.
Bankın direktorları memorandumu təsdiq etdikdən sonra (bankın proseduralarına görə bunun üçün 10 gün tələb olunur), IBTA-2 kredit sazişinə əlavələrin imzalanması keçiriləcək. Bu, "quş qripi" ilə mübarizə üzrə layihənin gerçəkləşdirilməsini sürətləndirməyə imkan verəcək.
Kredit vəsaitləri əsasən Dövlət Baytarlıq Xidmətinin texniki bazasının, laboratoriyalarının möhkəmləndirilməsi məqsədilə avadanlıqlar alınması üçün nəzərdə tutulub. Hazırda DB-nin mütəxəssisləri bu komponent üzərində ətraflı iş aparır. DB mütəxəssisləri baytarlıq komponentinin bankın kənd təsərrüfatı layihəsinin ikinci fazasına da daxil edilməsi, həmçinin dövlət büdcəsindən Xidmət üçün vəsait ayrılmasını nəzərə alaraq təkrara yol verilməməsi üçün buna yenidən baxmaq niyyətindədir. Səhiyyə üzrə ikinci komponent də avadanlığın alınması, treninqlər keçirilməsi, laboratoriyaların reabilitasiyasını nəzərdə tutur.
