Azərbaycan və Rumıniya TRACECA nəqliyyat dəhlizinin hökumətlərarası katibliyinin (HAK) maliyyələşdirilməsi üçün vəsait keçirib. Avropa Komissiyası isə Tacikistan və Qırğızıstan üçün vəsait keçirib. Bu barədə Trend Azərbaycan üzrə TRACECA-nın milli katibi Akif Mustafayev məlumat verib.
Nəqliyyat dəhlizinin 5-ci hökumətlərarası iclasına kimi daha iki ölkə vəsait keçirəcək. Bundan sonra digər ölkələr də hesab pul keçirəcəklər. İclas mayın 2-3-də Sofiyada keçiriləcək.
HAK-in illik maliyyələşdirilməsi 600 min avro məbləğində qiymətləndirilir. 2005-ci ilə qədər bu vəsait Avropa Komissiyası tərəfindən təqdim edilirdi. 2005-ci ildə iştirakçı ölkələr tərəfindən 7 min avro təqdim edilib, vəsaitin digər hissəsini isə Avropa Komissiyası ödəyib.
2006-cı ildə HAK-in maliyyələşdirilməsi iştirakçı ölkələrin hesabına həyata keçiriləcək. Hər bir ölkə 50 min avro ödəməlidir. Razılaşmaya görə, bu vəsait 1-ci rübün sonuna kimi təqdim olunmalıdır. Əgər Əfqanıstanın nəqliyyat dəhlizinə birləşmək barədə razılaşmanın ratifikasiyası bu il həyata keçirilərsə, o zaman Avropa Komissiyası bu ölkənin əvəzinə vəsait ödəyəcək.