Bu gün Dünya Bankının (DB) kiçik qrantlar üzrə proqramının yeni raundunun təqdimat mərasimi keçirilib. Həmin raund çərçivəsində bank 34 min dollar ayırıb. Trend agentliyinin DB-nın Bakı nümayəndəliyinin rəhbəri vəzifəsini icra edən Səidə Bağırovaya istinadən yaydığı məlumata əsasən, ilk dəfə olaraq vəsaitlərin idarə olunması yerli fonda "Azərbaycan İcma İnkişafı üzrə Araşdırmalar, Təlim və Resurs Mərkəzi" milli qeyri-hökumət təşkilatına verilib. Bununla əlaqədar DB-nın Bakı ofisi ilə QHT arasında sənəd imzalanıb.
Proqramının icrasına başlanılmış 2000-ci ildən etibarən laiyhələrin idarə olunması bankın yerli nümayəndəliklərinə tapşırılırdı. 6 il ərzində Azərbaycanda qeyri-hökumət təşkilatının 46 layihəsinin maliyyələşdirilməsi üçün bank tərəfindən 200 min dollar ayrılıb. Son üç ay ərzində kiçik qrantlar proqramında Soros, Avrasiya, "Açıq Cəmiyyət İnstitutu" da iştirak edib. Nümayəndəliyin rəhbəri proqramın yeni mərhələsində DB-nın vəsaitlari ilə yanaşı başqa maliyyə mənbələrinin də cəlb olunma ehtimalını istisna etmir. Bu, layihələrin sayının və maliyyə həcminin artmasına təsir göstərəcək.
Bağırlının dediklərinə görə, QHT layihələrinin qeyri-adi maliyyləşdirmə formasının seçilməsində əsas məqsəd yeniliklərin tətbiq olunması və tərəfdaş əlaqələrinin yaradılmasıdır.
"Azərbaycan İcma İnkişafı üzrə Araşdırmalar, Təlim və Resurs Mərkəzi"nin icraçı direktoru Yasin Dadaşev bildirib ki, ayrılmış vəsaitlər hesabına təxminən 7 layihə maliyyələşdirilə bilər. Layihələrin hər birinə orta hesabla 4-5 min dollar düşür. Layihələrin seçilməsi zamanı əsas diqqət əhalinin zəif təbəqələrinin inkişafı, məlumata çıxışın təmin olunması, xarici təşkilatlarla əlaqələrin qurulmasına ayrılacaq. Bununla əlaqədar layihələr təhsil, səhiyyə, icma və gəncliyin inkişafına, eləcə də rüşvətxorluqla, yoxsulluqla mübarizə tədbirlərinə yönəldilə bilər.
