Kənd təsərrüfatı naziri İsmət Abasov Fransanın Azərbaycana yeni təyin olunmuş səfiri Bernar Amodrik dü Şafonu qəbul edib. Nazirlikdən Trend ə verilən məlumata görə, görüş zamanı iki ölkə arasında aqrar sahədə əməkdaşlığın inkişafı məsələləri müzakirə olunub.
Görüşdə Dövlət Baytarlıq Xidmətinin üç layihədən ibarət proqramı nəzərdən keçirilib. Layihələr vaksinasiya məsələlərində yardım, laboratoriya şəraitinin yaxşılaşdırılması, iribuynuzlu mal-qaranın qeydiyyat və identifikasiyasını nəzərdə tutur. 10-dan çox baytarlıq idarəsində təmir işləri aparılıb.
Bundan əlavə, 2003-cü ildən səfirlik və kənd təsərrüfatı palatasının dəstəyilə Qubadakı elmi mərkəzdə gerçəkləşdirilən Frazer layihəsi çərçivəsində tədbirlər müzakirə olunub. Həmin layihəyə müvafiq olaraq, təxminən 4 min hektarlıq ərazidə meyvə bağları salınıb. 2006-cı ildə bu bağları daha da genişləndirmək planlaşdırılır.
Görüşdə layihə müddətinin uzaldılması həqqında qərar qəbul olunub.
Nazir fransız sahibkaraları tərəfindən Azərbaycanın şərabçılıq sahəsinə vəsait qoyulmasını məqsədəuyğun saydığını deyib.
Səfir fransız şirkətlərinin bu sahəyə cəlb olunmasında köməklik göstərməyə hazır olduğunu qeyd edib.
