Azərbaycanın Maliyyə Nazirliyi yarım il və bir il üçün nəzərdə tutulmuş dövlət uzunmüddətli istiqrazlarını buraxmağa hazırlaşır. Nazirlikdən Trend ə verilən məlumata görə, dövlət qiymətli kağızların tənzimlənməsi üzrə Koordinasiya Şurası uzunmüddətli istiqrazların buraxılması dövriliyini razılaşdırıb və təsdiq edib.
Yarım illik dövlət kağızları 3 həftədə bir dəfə, illik istiqrazlar isə 4 həftədə 1 dəfə yerləşdiriləcək. Nəticədə ayda 1 dəfə 6 və 12 aylıq dövlət kağızları dövriyyəyə çıxarılacaq. Nazirlik əvvəlki kimi 3 aylıq DQİ -nin yerləşdirilməsini davam etdirəcək.
Dövlət kağızları bazarında AMB-nin qısamüddətli notları da dövriyyədə olacaq. Bu notlar 1 ay üçün (15 və 30 günlük) nəzərdə tutulub.
Maliyyəçilər hesab edir ki, qısamüddətli notlarda olduğu kimi uzunmüddətli notların da faiz dərəcəsi bazar tərəfindən tənzimlənəcək.
