Azərbaycan hökuməti və Almaniyanın KFW bankı Gəncə və Şəkidə su şəbəkələrinin yenidənqurulması layihəsilə bağlı razılığa gəlib. Bu barədə Trend ə bankın Bakı ofisinin rəhbəri Natiq Abdullayev bildirib.
Mayın əvvəlində Bakıda layihənin meneceri Teodor Dikmann Bakıda səfərdə olub. Kredit sazişi mayın sonu-iyunun əvvəlində imzalana bilər.
Bank kreditin şərtlərini asanlandırmağı qərarlaşdırıb. Tariflərin artırılması bəndi sazişdən çıxarılıb. Bu proseas hökumətin öhdəsinə buraxılıb.
Hökumətin layihədəki iştirak payının 1,25 mln. avrodan 8,25 mln. avroyadək artırılması məsələsi açıqdır. Bu vəsaitlər layihənin birinci mərhələsinin gerçəkləşdirilməsi zamanı 3-4 il ərzində ayrılacaq.
Maliyyə Nazirliyindən Trend ə verilən məlumata əsasən, əlavə vəsait su şəbəkələrinin bərpası və işlək səviyyədə saxlanılması üçün nəzərdə tutulur. 4 illik layihənin birinci mərhələsinin dəyəri 54 mln. avro həcmində qiymətləndirilib ki, 37 mln. avro KfW, 10 mln. avro SECO, 7 mln. avro isə Azərbaycan (artırılmadığı halda) təqdim etməlidir.