Dünya Bankının "Azərbaycanın institusional inkişafına texniki yardım" (IBTA-2) layihəsi çərçivəsində ayrılmış kredit hesabına həyata keçirilən Azərbaycanın baş dövlət xəzinəsinin avtomatlaşdırılması üzrə komponentin başa çatdırılması üçün layihənin müddəti uzadıla bilər. Maliyyə Nazirliyindən Trend ə verilən məlumata əsasən, bu, regional maliyyə şöbələrinin avtomatlaşdırılması üçün kredit vəsaitlərinin tam ödənilməməsi ilə bağlıdır. Təmir işləri üzündən Naxçıvan Muxtar Respublikası xəzinə bölməsində avtomatlaşdırma aparılmayıb. Nazirlikdə hesab edirlər ki, yarım il ərzində bu tədbirləri tam başa çatdırmaq mümkün olacaq. Bununla əlaqədar DB layihənin müddətini 6 ay uzatmağı təklif edib.
Xəzinə tam avtomatlaşdırılmış şəkildə 2006-cı ilin sonuna qədər fəaliyyət göstərəcək. Bundan əvvəl isə işçilər üçün böyük miqyaslı təlim proqramı həyata keçiriləcək.
Bu layihənin gerçəkləşdirilməsi üçün ABŞ-ın Beynəlxalq İnkişaf Agentliyi (USAID) proqram təminatının alınmasına $2,9 mln.həcmində qrant ayırıb. Avadanlıq IBTA-II layihəsi çərçivəsində ayrılan $2,85 mln. həcmindəki kredit hesabına alınır. Ümumi xərclər təxminən $6 mln. təşkil edəcək. Xəzinə sistemi 1997-ci ildən yaradılıb. Xəzinənin baş ofisi ilə 86 regional şöbəsi arasında informasiya sisteminin yaradılması, büdcə vəsaitlərinin xərclənməsi üzərində nəzarətini qurmağa və büdcə maliyyləşdirilməsi üçün prioritet sahələri müəyyənləşdirməyə imkan verəcək.
IBTA-2 layihəsinin ümumi dəyəri $10,6 mln. təşkil edir ki, bunun $5,1 mln. həcmində istifadə olunmamış hissəsi quş qripi ilə mübarizəyə yönəldilib.
Layihə 2002-ci ildə təsdiqlənib və əvvələr nəzərdə tutulmuş 10 komponentdən 4-ü əhatə edib.