"Məhkumların sosial reablitasiyası haqqında" qanun layihəsinin hazırlanması ilə bağlı işçi qrupu yaradılıb. Trend xəbər verir ki, bu barədə Milli Məclisin sosial siyasət daimi komissiyasının üzvü Elmira Axundova bildirib.
Millət vəkili qeyd edib ki, bu sənəd üzərində iş aparılır: " Belarusun təcrübəsi və Avropa Şurasının tövsiyələri bu sənəddə öz əksini tapacaq. Artıq işçi qrupları formalaşdırılıb. Milli Məclisin payız sessiyasında bu qanun layihəsinin müzakirəyə çıxarılmasını planlaşdırmışıq".
E.Axundova bildirib ki, sovetlər dönəmində həbsxanalarda psixoloqlar, sosial işçilər var idi. Həbsxanadan çıxmamışdan üç ay öncə onların iş yerləri müəyyən olunurdu, saxlandıqları müəssisələrdə onlara xüsusi pasport verirdilər. Həbsxananı tərk edən insan bu pasport vasitəsilə qeydiyyata da düşə bilərdi, işə də göürülərdi: "İndi bir çox məhkumlar azadlığa buraxılandan sonra əllərində qeydiyyat vəsiqəsi də olmur. Azadlığa çıxan şəxs şəxsiyyət vəsiqəsini düzəltmək üçün problemlərlə üzləşir".
Millət vəkili bildirib ki, azadlığa çıxan məhkumlar belə problemlərlə üzləşməmək üçün xüsusi orqan yaradılmalıdır: "Sovet dönəmində prokurorluqlarda məhkumların sosial reablitasiyası ilə məşğul olan şöbələr var idi ki, indi onlar ləğv olunub. Bunu əvəz edən bir qurum yaradılmalıdır".
