Avqustun 27-29-da Koreyanın kommersiya, sənaye və energetika nazirinin müavininin başçılıq etdiyi iqtisadi əməkdaşlıq üzrə missiya Azərbaycana səfər edəcək. Bu barədə Trend ə İqtisadi İnkişaf Nazirliyindən məlumat verilib. Səfər zamanı Azərbaycan və Koreya arasında gələcək əməkdaşlığın mümkün yolları müzakirə olunacaq, hər iki ölkənin iş adamlarının görüşü keçiriləcək və konkret layihələr müəyyən ediləcək.
Koreya tərəfin təşəbbüsü ilə iyulun 18-də Seulda Azərbaycanın əsasən onları maraqlandıran sahələrində (energetika, İT) investisiya imkanlarının təqdimatı keçirilib. Ancaq Azərbaycan hökumətinin iqtisadiyyatın qeyri-neft sektorlarının inkişafındakı prioritetlərini nəzərə alaraq turizm, kənd təsərrüfatı və aqrar sektorların da təqdimatı keçirilib.
Azərbaycana maraq may ayında Koreya prezidenti Ro Mu Nyunun AR-ə səfərindən sonra artıb. Səfər zamanı hər iki ölkə arasında neft kimya, yol tikintisi, kənd təsərrüfatı sahələrində, bank və sığorta bazarında əməkdaşlıq üçün böyük potensialın olduğu qeyd edilib.
Bu gün Koreya şirkətləri elektron-məişət avadanlıqdarı, avtomobillərin satışı və onlara texniki xidmətin göstərilməsi sahələrində təmsil olunub.