Rusiyanın ən böyük gəmiçilik şirkəti "Sovkomflot" Xəzər üzrə neft nəqli bazarına çıxa bilər. Gəmiçilik artıq "Dəniz və neft-qaz layihələri" qrupu ilə donanma tikintisi haqqında danışıqlara başlayıb. Bu barədə Trend "Kommersant" qəzetinə istinadən xəbər verir.
Gəmiçiliyin menecmenti Britaniyanın BP (Bakı-Tbilisi-Ceyhan boru kəmərinin operatoru), Fransanın Total ("Kaşagan" yatağında işləyən Agip KCO konsorsiumunun iştirakçısı) və Şimali Xəzər şelfində hasilat üzrə bir sıra perspektiv layihələri həyata keçirən LUKOYL ilə ilkin danışıqlara başlayıb.
"Sovkomflot" artıq "Dəniz və neft-qaz layihələri" qrupu ilə 13-25 min ton dedveytli 5-10 tankerdən ibarət seriyanın tikinti layihəsinin müzakirəsinə başlayıb. Müqavilənin dəyəri 300 mln. ABŞ dollarına qədər ola bilər.