İCARDA (International Center for Agricultural Research in the Dry Areas) mütəxəssisi, təşkilatın toxumçuluq departamentinin başçısı Zevdiye Bişounun Azərbaycan səfəri başa çatdı. Bu barədə Trend ə Kənd Təsərrüfatı Nazirliyinin elm-aqrar mərkəzindən məlumat verilib.
Səfər zamanı o, kənd təsərrüfatı nazirinin müavini Bəhram Əliyevlə görüşüb, nazirliyin elm-aqrar mərkəzində görüş keçirib, kənd təsərrüfatı bitkilərinin toxumlarının istehsalı üzrə müəssisəyə baş çəkib, Kənd Təsərrüfatı Nazirliyinin şöbələrinin fəaliyyəti ilə yaxından tanış olub.
Səfərin əsas məqsədi tövsiyyələrin hazırlanması yolu ilə Azərbaycanda toxumçuluq proqramının hazırlanmasına yardım etmək, ölkənin aqrar sahəsində toxumla təmin etmə sistemi ilə tanışlıqdan ibarətdir.
O, ECO ölkələrində, o cümlədən Azərbaycanda bu sahəyə dair hesabat hazırlayacaq.
Departament başçısının səfəri Mərkəzi Asiya və Cənubi Qafqazda kənd təsərrüfatının davamlı inkişafı üzrə birgə əməkdaşlıq proqramı çərçivəsində keçib.
Qeyd edək ki, su və torpağın səmərəli idarə olunması yolu ilə fermer təsərrüfatlarının gəlirlərinin artırılmasına yönəldilmiş layihənin monitorinqini keçirmək məqsədi ilə sentyabrın 16-da İCARDA-nın Orta Asiya və Cənubi Qafqaz bölgələri üzrə koordinatoru Racendra Paroda Bakıya gələcək.
İCARDA 1977-ci ildə təsis olunub, onun qərargahı Hələbdədir (Suriya).
