Cari ilin yanvar-avqust ayrları ərzində Azərbaycanda ÜDM-in həcmi keçən ilin analoji göstəriciləri ilə müqayisədə 34,4% yüksəlib. Dövlət Statistika Komitəsindən Trend ə verilən məlumata əsasən, 2006-cı ilin sentyabrın 1-nə olan vəziyyətə görə, cari qiymətlərdə ÜDM göstəricisi 10,3 mlrd. manat təşkil edib. Adambaşına düşən ÜDM-in həcmi 32,8% artaraq 1233,5 manat ($1363,6) təşkil edib.
ÜDM-də istehsalın payı 2005-ci ilin yanvar-avqust aylarında qeydə alınmış 65,31%-dən cari ilin 8 ayı ərzində 70,4%-dək yüksəlib. ÜDM-də xidmət sahəsinin xüsusi çəkisi isə 27,2%-dən 22,4%-dək azalıb. Məhsullardan və idxaldan xalis vergi ÜDM-də 7,2% təşkil edib. Bu müddət ərzində sənayedə 5,8 mlrd. manatlıq ÜDM istehsal olunub ki, bu da ümumi ÜDM-in 56,7%-ni təşkil edir. Kənd təsərrüfatı, ovçuluq və meşəçilik sahələrində 546,9 mln. manatlıq (5,3%), tikinti sahəsində 862,9 mln. manatlıq (8,4%), nəqliyyat sahəsində 517,9 mln. manatlıq (5%), rabitə sahəsində 260,1 mln. manatlıq (2,5%), topdansatış və pərakəndə ticarətdə, avtomobil sahəsində, məişət avadanlıqları, şəxsi istifadə əşyalarının təmiri üzrə xidmət sahəsində 587,8 mln. manatlıq (5,7%), restoran və mehmanxana sektorunda 75,9 mln. manatlıq (0,8%), sosial və digər xidmətlər üzrə 867,5 mln. manatlıq (8,4%) əlavə məbləğ əldə olunub.
