2006-cı ilin yanvar-sentyabr ayları ərzində dövlət büdcəsinin gəlirli hissəsinə faktiki daxilolmalar ötən ilin analoji dövrü ilə müqayisədə 84,9% və ya 1231,9 mln. manat artaraq, 2683,6 mln. manat (ÜDM-nin 21,1%-i) təşkil edib. Bu barədə Trend ə hökümətdən məlumat verilib. Dövlət büdcəsinin xərcləri 62,8% (933,9 mln. manat) artıb və 2420,9 mln. manat (ÜDM-in 19%-i) təşkil edib.
9 ay ərzində büdcənin qalığı 262,7 mln. manat təşkil edib, bu isə ÜDM-in 2,1%-dir.
Dövlət büdcəsinin gəlirli hissəsinin strukturunda 67% (1797,3 mln. manat) Vergilər Nazirliyinin hesabına təmin olunub. Vergi yığımları üzrə proqnoz 100,7% yerinə yetirilib. Gömrük rüsumları və vergilərdən daxilolmalar üzrə proqnoz 102% yerinə yetirilməklə, 384,5 mln. manat (14,3% xüsusi çəki ilə) təşkil edib.
Hesabat dövründə ƏDV-dən 554 mln. manat daxil olub, bu isə ümumi gəlirin 20,6%-ni təşkil edir. Gəlir vergisindən - 422 mln. manat (15,7%), mədaxil vergisindən - 220,4 mln. manat (8,2%), aksiz vergisindən - 127, 6 mln. manat (4,8%), xarici iqtisadiyyat fəaliyyəti üzrə vergilərdən isə - 196,6 mln. manat (7,3%) daxil olub.
Əhalinin sosial təminatı və müdafiəsinə 9 ay ərzində büdcə vəsaitlərindən 230 mln. manat (9,5%), təhsilə - 320,1 mln. manat (13,2%), prokurorluq, təhlükəsizlik, hüquq-mühafizə orqanları, məhkəmələrin saxlanmasına - 162,4 mln. manat (18%), iqtisadiyyata sərmayə qoyuluşları - 839,6 mln. manat (34,7%), mənzil-kommunal xərclərinə - 37,9 mln. manat (30,2%), sənaye və tikintiyə - 562,4 mln. manat (5,2 dəfə), kənd, meşə təsərrüfatı, eləcə də balıqçılığa - 100,5 mln. manat (44,2%) sərf olunub. Əmək haqqı, təqaüd və müavinətlərin ödənilməsi üçün yanvar-sentyabr ayları ərzində büdcə vəsaitlərinin 30,3% (733,8 mln. manat) sərf olunub.
