Azərbaycan Nəqliyyat Nazirliyi 1 №-li Bakı dairəvi yolunun inşasına dair Türkiyənin "Mak Yol" şirkəti ilə müqavilə imzalayıb. Bu barədə Trend ə Nəqliyyat Nazirliyinin "Yolnəqliyyatservis" departamentinin rəhbəri Cavid Qurbanov məlumat verib.
Onun sözlərinə görə, müqavilənin dəyəri 51 mln. dollar təşkil edir. Yolun ümumi dəyəri isə 59 mln. dollardır.
Layihəni Küveyt İnkişaf Fondunun 15,27 mln. dollar, Abu-Dabi Ərəb İnkişaf Fondunun 10 mln. dollar məbləğində ayırdığı kredit vəsaitləri hesabına gerçəkləşdirmək nəzərdə tutulmuşdu. Ərəb maliyyə institutları tərəfindən kredit dörd ili güzəştli olmaqla 20 il müddətinə, illik 2,5% dərəcəsi ilə ayrılıb. Layihənin bahalaşması ilə əlaqədar olaraq vəsaitin çatışmayan hissəsi Azərbaycan tərəfindən təqdim oluna bilər. Bu məbləğ 26,42 mln. dollar təşkil edəcək.
C. Qurbanov qeyd edib ki, hazırda yola texnikanın gətirilməsi həyata keçirilir. "İnşa işlərinə 2006-cı ilin noyabrın ortalarında başlanacaq", - deyə o bildirib.
Layihənin dəyəri İordaniyanın "Arab Konsalt" şirkəti tərəfindən yolun təkrar texniki öyrənilməsi həyata keçirildikdən sonra dəqiqləşdirilib. Layihənin bahalaşması kommunikasiyaların yerinin dəyişdirilməsi, eləcə də yolun 5 km-lik hissəsi və bir sıra digər infrastrukturun inşası ilə izah olunur. Xüsusilə, yolu yeni avtovağzal kompleksi ilə birləşdirəcək yeni yol kəmərinin inşası nəzərdə tutulur. Bundan başqa, 90-cı illərin ortalarında bu layihənin texniki-iqtisadi əsaslandırması hazırlanan zaman bir çox səhvlərə yol verilib. Bununla yanaşı, tikinti materialları və xidmətlərin qiymətləri də 44%-45% artıb.