Azərbaycanın Standartlaşdırma, Metrologiya və Patent üzrə Dövlət Agentliyi gələn il 2 əlavə regional idarə açmaq niyyətindədir. Trend -in məlumatına görə, bu haqda Agentliyin baş direktoru Ramiz Həsənov bildirib. Onun sözlərinə görə, bu, ölkə ərazisinin əhatə olunmasını genişləndirmək və Dövlət Agentliyinin tədbirlərini effektiv etmək üçündür.
O qeyd edib: "Hazırda regionlardakı idarələrin sayı 9-dur və Azərbaycanda sənaye sferasının inkişafı ilə əlaqədar olaraq ölkədə yeni müəssisələr açılır. Buna görə bizim işimiz də bir az çətinləşir, belə ki, bizim bütün müəssisələri yoxlamaq imkanımız olmur".
Azərbaycanın Standartlaşdırma, Metrologiya və Patent üzrə Dövlət Agentliyi Azərbaycan prezidentinin 2001-ci il 27 dekabrda verdiyi sərəncama əsasən yaradılıb.
Agentlik icra hakimiyyətinin standartlaşdırma, metrologiya, sertifikatlaşdırma və sənaye mülkiyyətində olan obyektlərin mühafizəsi sahəsində dövlət siyasətini formalaşdıran və həyata keçirən mərkəzi orqandır.
Dövlət Agentliyinin Naxçıvan MR-da, Gəncədə, Sumqayıtda, Şəkidə, Salyanda, Lənkəranda və respublikanın digər regionlarında regional şöbələri var.
