Azərbaycan Lizinq Şirkətləri Assosiasiyası (ALCA) ölkənin Bank Tədris Mərkəzi ilə birgə respublikanın lizinq sektoru üçün forum keçirməyə hazırlaşır. Bu barədə Trend ə Assosiasiyanın prezidenti Ceyhun Məmmədbəyli məlumat verib.
Onun sözlərinə görə, forumun dekabrın 9-da Bakıda keçirilməsi planlaşdırılır. Bank sektorunun top-menecerləri üçün analoji tədbir bu yaxınlarda ABTM tərəfindən keçirilib.
"Forumda lizinq sektorunda mühüm məsələlərin müzakirəsi, fikir mübadiləsinin aparılması planlaşdırılır. Bunun üçün bütün lizinq şirkətləri dəvət olunacaq", - deyə C.Məmmədbəyli qeyd edib.
Bu sektorda problemlərdən biri lizinq fəaliyyətinə vergi qoyulmasından ibarətdir. Ancaq Assosiasiyanın 2007-ci ilin vergi qanunvericiliyinə təklifləri yenə də nəzərə alınmayıb. Buna baxmayaraq ALCA rəhbəri ümid edir ki, lizinq fəaliyyətinin inkişafı üçün gələn il dəyişikliklər ediləcək.
Beynəlxalq Maliyyə Korporasiyasının məlumatına görə, hazırda Azərbaycanda lizinq xidmətlərinin dövriyyəsi 60 mln. dolları keçir. "Bu, çox kiçik məbləğdir və daha çox da ola bilərdi", - deyə assosiasiya rəhbəri hesab edir.
Assosiasiya 27 oktyabr 2004-cü ildə yaradılıb və 12 üzvü var.