Azərbaycan və Belarus ölkələr arasında xarici ticarət dövriyyəsini ən azı 5 dəfə artırmaq üçün potensiala malikdirlər. Azərbaycan Vergilər Nazirliyindən Trend ə verilən məlumata görə, bu barədə vergilər naziri Fazil Məmmədovla görüşdə Belorusun AR-də Fövqəladə və Səlahiyyətli Səfiri Nikolay Paşkeviç bildirib.
Səfirin sözlərinə görə, hazırda ölkələr arasındakı əmtəə dövriyyəsi 30 mln. ABŞ dolları təşkil edir, bu isə real imkanları əks etdirmir, ona görə də mövcud potensialdan geniş istifadə etmək lazımdır. "Belarus AR-də bir çox iqtisadi layihələrdə iştirakda maraqlıdır. O cümlədən, sovet vaxtından qalan maşınqayırma sənayesinin də böyük potensialı var. Gəncə avtomobil zavodunda elə texnoloji istehsalat xətləri var ki, onlara maşınqayırma sənayesində həmçinin böyük potensialının olması ilə fərqlənən Belarusda rast gəlmək mümkün deyil", - deyə N.Paşkeviç qeyd edib.
Belarus iş adamları avtomobil yığımının təşkilində maraqlıdırlar. Səfirin sözlərinə görə, bu istehsalatın maya dəyərinin azaldılması və yaxın bazarlara çıxmaq üçün şərait yaradılacaq. Bu layihənin həyata keçirilməsi üçün artıq iki müqavilə bağlanıb. O həmçinin iş adamlarının Sabunçu maşınqayırma zavodunun və B.Sərdarov adına maşınqayırma zavodunun potensialına marağının olması barədə məlumat verib. O hesab edir ki, Azərbaycanda traktor və digər kənd təsərrüfatı texnikasının istehsalı üçün hər cür şərait var.
Nazir ölkələr arasında iqtisadi münasibətlərin genişləndirilməsində səfirin səylərini dəstəkləyib. "Ölkədə həm Belarus iş adamlarının investisiya iqliminin cəlbediciliyini yüksəltmək üçün, həm də qarşılıqlı sərmayə qoyuluşları üçün imkanlar var", - deyə F.Məmmədov qeyd edib. O, 100 mln. ABŞ dolları həcmində kapitalla yaradılmış Azərbaycan investisiya şirkətinin potensialından istifadə etmə imkanını öyrənməyi təklif edib. Nazir həmçinin iqtisadi münasibətlərin qaydaya salınmasında Belarus səfirliyinə hər cür dəstəyi göstərməyə hazır olduğunu bildirib. O ümid edir ki, Belarus iş adamları ölkədə vergi qanunvericiliyinin yenilənməsində də fəal olacaqlar.