2005-ci ilin oktyabr ayı ilə müqayisədə 2006-cı ilin noyabr ayında istehlak mallarının qiyməti və xidmət tariflərinin artım templəri 1,3% təşkil edib. Dövlət Statistika Komitəsindən Trend ə verilən xəbərə görə, bu dövrdə ərzaq mallarının qiyməti 2,1%, qeyri-ərzaq mallarının qiyməti - 0,8% bahalaşıb, xidmət tarifləri isə əvvəlki səviyyədə saxlanılıb.
Dövlət statistika komitəsi noyabr ayında ət məhsullarının qiymətinin - 0,2%, süd məhsulları, pendir və yumurtanın qiymətinin -1%, çörək məhsullarının qiymətinin - 2,1%, balıq məhsullarının qiymətinin - 2,5%, tərəvəzlərin - 6,5%, meyvələrin - 8,6%, mineral su və sərinləşdirici içki və şirələrin - 1,3%, qənd və qənnadı məhsulların - 0,2%, yağların - 0,5% bahalaşdığını bildirib. Bu dövr ərzində qəhvə, çay, kakao - 0,5%, pivə - 0,5%, tütün məmulatları - 0,3%, spirtli içkilər - 1,4% ucuzlaşıb.
Ötən ilin analoji dövrü ilə müqayisədə 2006-cı ilin ötən 11 ayı ərzində inflyasiyanın artım templəri 8% təşkil edilib. Bu zaman ərzaq mallarının qiyməti 11,5%, qeyri-ərzaq mallarının qiyməti - 5,1%, xidmət sahəsində tariflər isə - 2,5% artıb. Ötən ilin analoji dövrü ilə müqayisədə noyabr ayında istehlak mallarının qiyməti və xidmət tarifləri 11,5%, dekabra nisbətən isə - 9% bahalaşıb.
