Oğuz-Qəbələ-Bakı su kəmərinin tikintisi layihəsi çərçivəsində idarəetmə və texniki-nəzarət üzrə konsaltinq xidmətləri və şüşəlifli poliester boruların alınması üzrə keçirilən tender başa çatıb. Bu barədə Trend Azərsu Səhmdar cəmiyyətinə istinadən xəbər verir.
Boruların alınması üzrə Azkompozit Azərbaycan, konsaltinq xidmətləri üçün tenderdə isə Almaniyanın CES Consultinq Engineers şirkəti ilə razılaşma imzalanıb.
Bakının su təhcizatını yaxşılaşdırmaq üçün Oğuz-Qəbələ zonasında su kəmərinin çəkilməsi barədə sərəncam 2002-ci ilin dekabrında prezident Heydər Əliyev tərəfindən qəbul edilmişdi.
2005-ci il sentyabrın 1-də ölkə prezidenti yanında müşavirədə Oğuz-Qəbələ-Bakı su borusunun çəkilməsi məqsədəuyğun hesab olunub və TİƏ-nin hazırlanması barədə sərəncam verilib.
Bu zonada yeraltı suyun istismar ehtiyatları 15 m3/san-dən çoxdur. Suyun keyfiyyəti yüksəkdir və dünya standartlarına tamamilə cavab verir.
Su kəməri marşrutu Oğuz-Qəbələ ərazisindəki su anbarından gəlib Çarhan-Göyçay-Ağsu-Udullu ərazisinə keçəcək. Onun ümumi uzunluğu 280 km olacaq.
