Avropa Yenidənqurma və İnkişaf Bankı Biləcəri və Böyük-Şordakı depoda lokomotivlərə xidmət bazalarının yaradılması, eləcə də Azərbaycan dəmir yolunun (ADDY) ehtiyat hissələrinin alınması üçün kredit sazişinin Direktorlar şurası tərəfindən baxılması müddətini yenə də başqa vaxta keçirib. Trend in verdiyi xəbərə görə, AYİB-in məlumatında qeyd olunub ki, sazişin baxılma müddəti 15 may 2007-ci il tarixindən 12 iyun 2007-ci il tarixinə keçirilib.
Layihənin hazırlanması üzrə işlər Britaniyanın Trust Fund şirkəti tərəfindən 49,95 min avro məbləğində maliyyələşdirilir. Əvvəl Azərbaycan hökuməti lokomotivlərin alınmasının AYİB krediti hesabına maliyyələşdirilməsindən imtina edib. Layihəyə qoyulan 50 mln. ABŞ dolları həcmində kreditin ümumi məbləğindən 27 mln. ABŞ dolları lokomotivlərin alınması, 23 mln. ABŞ dolları məbləğində ikinci tranş isə - Biləcəri və Böyük-Şordakı depoda lokomotivlərə xidmət bazalarının yaradılması, eləcə də ADDY-nin ehtiyat hissələrinin alınması üçün nəzərdə tutulub.
Birinci komponentin istisna olunmasına baxmayaraq, Azərbaycan Avropa bankından 30 mln. ABŞ dolları məbləğində kredit alacağına ümid edir. İkinci komponentin bahalaşması, xüsusilə tikinti materiallarının qiymətinin artması ilə əlaqədardır.
