Azərbaycan, Bakı / Trend müx. İ.Xəlilova / Beynəlxalq kənd təsərrüfatının inkişafı fondunun (IFAD) "Dağ və yüksək dağ rayonlarının kənd təsərrüfatının inkişafı" layihəsinin agenti qismində çıxış edən Turanbank revolver hesabından kreditləşdirməyə başlayıb. Bu barədə bankın idarə heyətinin sədri Nazim Sadıxov məlumat verib.
Onun sözlərinə görə, hazırda bank 5 ilə qədər müddətə 250 min ABŞ dolları məbləğində birinci tranşı tamamilə yerləşdirib. Revolver hesabda qaytarılmış vəsaitlər hesabına 80 min ABŞ dolları yığılıb.
Bank IFAD-dan Azərbaycan Milli Bankının hesab faiz dərəcəsinə uyğun olan illik faiz dərəcəsi üzrə vəsait alırdı. Turanbank maliyyələşdirilən fəaliyyət növündən və kreditləşdirmə həcmindən asılı olaraq, 16-dan 21%-ə qədər illik faiz dərəcələri üzrə kreditlər verə bilər. Aqrar məhsulun emalı 16% altında, onun istehsalı və texnika və avadanlığın alınması 18%, aqrar məhsul ticarəti - 21% altında kreditləşdirilə bilər. Uzunmüddətli (4-5 il) və böyük kreditlər fərdi qaydada nəzərdən keçirilir və onların faiz dərəcələri 16% təşkil edə bilər.
N.Sadıxovun sözlərinə görə, 2006-cı ildən "Dağ və yüksək dağ rayonlarının kənd təsərrüfatının inkişafı" layihəsinin reallaşdırılması zonası Lerik, Gədəbəy, Şahbuz, Qəbələ və Quba rayonları üzrə genişlənib, layihə üzrə işlər İsmayıllı və Daşkəsən rayonlarında başlayıb.
Layihənin maliyyələşdirilməsi haqqında IFAD ilə kredit sazişi 27 noyabr 2000-ci il tarixində imzalanıb. Layihənin 7 ilinə nəzərdə tutulmuş ümumi büdcə IFAD-dan 9 mln., hökumətdən 1,5 mln. ABŞ dolları (400 min ABŞ dolları nağd, qalanları isə vergi güzəştləri ilə) daxil olmaqla və kənd icmalarının özünün iştirakı ilə, 10 mln. ABŞ dolları təşkil edir. Bu layihə çərçivəsində həmçinin 30 avqust 2004-cü il tarixindən mikromaliyyələşdirmə həyata keçirilir. Layihənin kredit komponentinin resurslarının ümumi məbləği 2,65 mln. ABŞ dolları təşkil edir və onlardan 1,5 mln. ABŞ dolları mikrokreditləşdirmə üçün nəzərdə tutulub və Mikromaliyyələşdirmə qeyri-bank kredit təşkilatı tərəfindən mənimsənilir.
