Azərbaycan,Bakı/müxbir Trend S.Babayeva/Bu gün Azərbaycan çayı çox zəif təbliğ olunur. Bu barədə Azərbaycan Çay İstehsalçıları Assosiasiyası İctimai Birliyinin prezidenti məlumat verib.
"Çay bizim milli sərvətimizdir və onun qorunması üçün Bakıda və Azərbaycanın digər regionlarında çay bayramları, yerli çay istehsalçılarının sərgilərinin keçirilməsi çox faydalı olar", - deyə o bildirib. Assosiasiya rəhbəri qeyd edib ki, çayçılıq sahəsinin inkişafı üçün Azərbaycanda parlamentin "Çayçılıq haqqında" qəbul etdiyi qanun kimi hüquqi əsas mövcuddur. Bunun üçün ilk növbədə, çayçılığın inkişafı ilə bağlı dövlət proqramının qəbulu, "Azərçay" işçi qrupunu yaratmaq və onun nəzdində kredit assosiasiyalarının fəaliyyətini təmin etmək lazımdır. "Bu sahəyə Dünya Bankı və digər beynəlxalq təşkilatların da diqqətini cəlb etmək lazımdır. Kadrlar hazırlamaq və onları Hindistan və Seylona göndərmək lazımdır", deyə F.Quliyev qeyd edib.
Assosiasiya rəhbəri hesab edir ki, hazırda çayçılıq Azərbaycanın aqrar sahəsinin ən gəlirli sahələrindən biridir və onun inkişafı ölkənin sosial-iqtisadi inkişafına müsbət təsir edə bilər.
Azərbaycan Dövlət Statistika Komitəsinin məlumatına əsasən, 2006-cı ildə ölkədə çay istehsalı 3,5 sentner/ha məhsuldarlıqla 655 ton təşkil edib. Bu, 2005-ci illə müqayisədə 82 ton azdır.