Qazaxıstan,Astana/müxbir Trend K.Konırova/Mayda Aktauda üçtərəfli Qazaxıstan-Azərbaycan-Gürcüstan görüşü keçiriləcək. Görüşdə nəqliyyat məsələləri müzakirə olunacaq. Bu barədə Trend ın xüsusi müxbirinə Qazaxıstanın Nəqliyyat və Kommunikasiya Nazirliyindən məlumat verilib. Razılıq baş nazir Kərim Məsimovun Bakı və Tiflisə bu yaxınlardakı səfəri çərçivəsində əldə olunub.
Əsasən Aktau-Bakı-Poti/Batumi və Aksarayskaya-Samur-Poti/Batumi marşrutlarının rəqabət qabiliyyətinin artırılması məsələsinə, həmçinin üç dövlətin ərazisində ayrı-ayrı yük növlərinə olan nəqliyyat tariflərinin aşağı salınması məsələlərinə baxılacaq. Yeni Bakı-Tiflis-Qars dəmir yolunun tikintisinin reallaşdırılması məsələsində tərəflər hər iki istiqamətdə yüklərin cəlb olunmasına şərait yaratmaq haqqında razılığa gəlib.
Tərəflər həmçinin Qazaxıstan neft hasilatı şirkətlərinin Qara dənizə bir başa çıxışını təmin etmək məqsədilə Batumidə neft emalı zavodunun tikintisi layihəsinin reallaşdırılmasında əməkdaşlığın davam etdirilməsi haqqında razılığa gəlib. Qazaxıstan qazının Gürcüstana çatdırılması üçün iqtisadi cəhətdən məqsədyönlü sxem və marşrutların araşdırılması üzrə işlər davam etdirələcək.
Poti terminalında taxıl terminalının tikintisi layihəsinin həyata keçirilməsi üzrə konkret təkliflərin 2007-ci ilin sonuna qədər təqdim olunması barədə razılıq əldə olunub. Bundan başqa, Gürcüstan tərəfi Gürcüstandan Qazaxıstana kənd təsərrüfatı məhsulları çatdırmalarının artırılması imkanlarının müzakirə olunmasını təklif edib.
Xəzər və Qara dəniz hövzələri ölkələrini əlaqələndirən yeni telekommunikasiya-informasiya dəhlizinin yaradılması üzrə təkliflərin 2007-ci ilin sonuna qədər işlənib hazırlanması barədə razılıq əldə olunub.
Hər iki ölkənin maliyyə nazirliklərinə milli banklarla yanaşı Qazaxıstan və Gürcüstan arasında Gürcüstanın Qazaxıstan qarşısında borclarının restrukturizasiyası haqqında üç ay ərzində sazişin hazırlanması tapşırılıb. Turizm sahəsində əməkdaşlıq və qarşılıqlı anlaşma Memorandum layihəsinin 2007-ci ilin sonuna qədər hazırlanması haqqında razılıq əldə olunub.
