Azərbaycan,Bakı/müxbir Trend S.Əliyeva/Çərşənbə axşamı Bakıda Azərbaycan, Gürcüstan və Türkiyənin nəqliyyat administrasiyaları nümayəndələrinin görüşü keçirilib. Görüşdə Bakı-Tbilisi-Qars marşrutu üzrə dəmir yolunun tikintisi layihəsinin reallaşdırılması məsələsi müzakirə olunub. Bu barədə nazirlikdən məlumat verilib.
Azərbaycanın nəqliyyat nazirinin müavini Musa Pənahovun qeyd etdiyi kimi, dəmir yolunun layihələndirilməsi iyunun ortalarında başa çatacaq və ayın sonuna qədər podratçının müəyyən edilməsi istiqamətində tenderin elan edilməsi üçün sənədlər hazırlanacaq. Avqustun ortalarında podratçı müəyyənləşdiriləcək və Türkiyə-Gürcüstan sərhədindən Axalkalakiyə (Gürcüstan) qədər qolun tikintisinə başlanacaq.
Bakıdakı görüş iki gün davam edəcək. Görüşdə həmçinin yol hissələrinin layihələndirilməsi, Türkiyə və Gürcüstanda sürətli yolların tikintisi, layihənin koordinasiya şurası və onun nizamnaməsinin formalaşdırılmasının müzakirəsi nəzərdə tutulur.
Azərbaycan artıq Gürcüstana Bakı-Tbilisi-Qars marşrutu üzrə layihə çərçivəsində 50 mln. dollar təqdim edib. Hazırda Türkiyənin "Yuksel Domonik" şirkəti yolun Gürcüstan hissəsinin texniki-iqtisadi əsaslandırılmasının (TİƏ) hazırlanmasını davam etdirir.
Mayın ortalarında Gürcüstan ərazisində dəmir yolunun yenidən qurulması layihəsinin texniki-iqtisadi əsaslandırılması başa çatdıralacaq. Gələcəkdə tenderin elan olunması nəzərdə tutulur. Beləliklə, bilavasitə tikintinin iyulda başlanması nəzərdə tutulur.
Öncə Azərbaycan prezidenti "Bakı-Tbilisi-Qars yeni dəmir yolu layihəsinin reallaşdırılması layihəsində tədbirlər haqqında" sərəncam imzalayıb. Bu sənədə əsasən, nəqliyyat naziri Ziya Məmmədovun başçılığı altında dövlət komissiyası yaradılıb. Komissiyanın tərkibinə maliyyə, xarici işlər, iqtisadi inkişaf nazirliklərinin nümayəndələri, Dövlət Neft Fondu, Dəmir Yolu və Beynəlxalq Bankın rəhbərləri daxildir.
Azərbaycan hökumətindən layihənin koordinatoru Nəqliyyat Nazirliyi təyin olunub. Nazirlik vasitəsilə Gürcüstan hökumətinə 200 mln. dollar məbləğində kredit ayrılacaq. Bu vəsaitlər Azərbaycanın Dövlət Neft Fondundan ayrılacaq.
