Azərbaycan, Bakı/ Trend müxbir İ.Xəlilova/ Maliyyə Nazirliyinin qiymətləndirməsinə əsasən, hazırda Azərbaycanda 5-6 şirkətin kapitallaşma ilə bağlı problemi var. Bunu nazirliyin Dövlət sığorta nəzarəti şöbəsinin rəhbəri Namiq Xəlilov bildirib.
"Bizim məqsədimiz şirkətləri bağlamaq deyil, belə ki, sığortaçıların da maraqları var. Biz bu şirkətlərin nizamnamə kapitallarını artırmasına nail olmaq üçün danışıqlar aparırıq. Yekun nəticədə isə əgər bu şirkətlər kapitallarını tələb olunan səviyyəyə çatdırmasalar, onların gələcəyi yoxdur" - deyə Xəlilov hesab edir.
Onun sözlərinə görə, kapitallaşma məsələsi Maliyyə Nazirliyinin diqqət mərkəzindədir və "Sığorta haqqında" qanunun qəbul olunması ilə 2010-cu il yanvarın 1-nə qədər faliyyətdə olan sığorta şirkətləri ilə yanaşı yeni yaradılan şirkətlərin də nizamnamə kapitalının ən azı 3 mln. manata çatdırılması üçün artım qrafikinə baxılacaq.
Hazırda isə onlar 2007-ci il yanvarın 1-nə olan qrafikə (nizamnamə kapitalı 700 min manat) əsaslanır. 2008-ci ilin əvvəlinə isə sığorta şirkətlərinin nizamnamə kapitalının həcmi 1 mln. manat olmalıdır.
Hazırda Maliyyə Nazirliyi tələblər üçün aralıq müddətlərin - yarım illik, yaxud illik müddətlərin müəyyən olunması üzərində işləyir.
