Azərbaycan, Bakı /müx. Trend İ.Xəlilova/ Azərbaycan İqtisadi İnkişaf Nazirliyindən verilən məlumata görə, Azərbaycanın Ümumdünya Ticarət Təşkilatına (ÜTT) qəbulu ilə bağlı danışıqlar qrupu təşkilatın işçi qrupunun qeyri-rəsmi görüşündə iştirak etmək məqsədilə Cenevrəyə yola düşüb. Nümayəndə heyətinə xarici işlər nazirinin müavini, ÜTT-yə qəbulla bağlı dövlət komissiyasının sədri Mahmud Məmmədquliyev başçılıq edir.
Görüşdə 30 mart 2006-cı il tarixində işçi qrupla aparılmış danışıqların dördüncü mərhələsindən sonra Azərbaycanda görülən işlər, həmçinin ÜTT-yə üzv dövlətlərin suallarına cavablar nəzərdən keçiriləcək.
Danışıqlar qrupu həmçinin ABŞ, Yaponiya, Cənubi Koreya və Tayvan ilə ikitərəfli danışıqlar keçirəcək. Bundan başqa, Azərbaycan nümayəndə heyəti ÜTT-yə daxil olma prosesinin sürətləndirilməsi ilə bağlı hindli həmkarları ilə müzakirələr aparacaq. Hazırda Azərbaycan hökuməti milli qanunvericiliyin ÜTT-nin tələblərinə uyğunlaşdırılması ilə bağlı unifikasiya işlərini gücləndirib. Dövlət komissiyasnın iyunun 6-da keçirilən sonun iclasında bu təşkilata daxil olmaq məqsədilə tədbirlərin gücləndirilməsi ilə bağlı qərar qəbul edilib.
Azərbaycan ÜTT ilə dörd görüş keçirib. İlk iki görüş xarici ticarət rejimi məsələlərinin müzakirəsinə həsr olunub, 2005-ci ildən başlayaraq isə axırıncı iki görüşdə ölkə genişmiqyaslı danışıqlara başlayıb. İkitərəfli danışıqlar Azərbaycan bazarına əmlak və xidmətlərin daxil olması, kənd təsərrüfatının və bu sahədə ixrac subsidiyalarının çoxtərəfli daxili dəstəklənməsi mövzusunda aparılır. 1997-ci ildən Azərbaycan ÜTT-yə nəzarətçi statusu ilə qəbul olunub.
