Azərbaycan, Bakı /müx. Trend S.Əliyev/ Avqustda Azərbaycanın "Trans Geyt" şirkəti "Daewoo International Corp." şirkəti ilə imzalanan saziş çərçivəsində Bakıya 200-dək Daewoo markalı avtobus gətirəcək. Bu barədə Azərbaycanın Nəqliyyat Nazirliyindən məlumat veriblər. Avqustda həmçinin "Nihad motors" şirkətinin aldığı 100 avtobus gətiriləcək.
Nazirlikdən bildiriblər ki, hazırda Bakıda istismarda olan avtobusların əksəriyyəti istifadədən çıxarılacaq. Bu avtobuslar nazirliyin texniki tələblərinə, habelə Azərbaycan prezidenti İlham Əliyevin sərəncamı çərçivəsində gerçəkləşdirilən Bakının nəqliyyat infrastrukturunun təkmilləşdirilməsi proqramına cavab vermir.
Avtobusların bir hissəsi bölgələrə göndəriləcək, digərləri isə (texniki cəhətdən standartlara cavab verməyən) istismara buraxılmayacaq.
"Daewoo International Corp." şirkəti ilə bağlanmış 1000 avtobus alınmasına dair sazişin ümumi dəyəri $60 mln. təşkil edəcək. Saziş fevralda Bakıda "Trans Geyt" (Azərbaycan) və "Daewoo International Corp." (Cənubi Koreya) arasında imzalanıb.