...

Azərbaycanda yaradılan Fındıq İxracatçıları Birliyinin tərkibi müəyyənləşib

Biznes və iqtisadiyyat xəbərləri Materials 23 Avqust 2007 15:39 (UTC +04:00)

Azərbaycan, Bakı/ Trend , müxbir İ.Xəlilova/ Azərbaycanın fındıq istehsal edən beş şirkəti Fındıq İxracatçıları Birliyində birləşəcəklər və yaxın iki həftədə onların ilk toplantısı keçiriləcək. Bu barədə cümə axşamı Azərbaycan İxrac və İnvestisiyaların Təşviqi Fondunun (AZPROMO) marketinq üzrə meneceri Teymur Tağıyev məlumat verib. "Onlar artıq ilkin razılığa gəliblər və toplantıda birliyin yaradılması haqqında Memorandum və təsisçilik haqqında müqavilə imzalayacaqlar" - deyə Tağıyev söyləyib. Fındıq İxracatçıları Birliyinə "BakFem", "Gilan", "ElFem", "Zakatala-findig" ("Azersun Holding"in tərkibinə daxildir) və "Ali Said" daxil olacaq.

Hazırda "BakFem", "Gilan", "ElFem" ölkədə əsas fındıq istehsalçılarıdır və böyük istehsal gücünə malikdirlər. "BakFem" və "Gilan" müəssisələri tamamilə Avropa avadanlıqları ilə təmin olunublar, lakin onların texnoloji və menecer xarakterli problemləri mövcuddur. Həmçinin fındığın tərkibində zəhərli maddə - aflatoksin olması da əsas problemlərdən biridir.

Birliyin əsas vəzifəsi aflatoksin probleminin həll olunması və Avropa standartları üzrə istehsalın təşkil olunması olacaq. Tağıyevin sözlərinə görə, Alman Texniki Yardım Cəmiyyəti (GTZ) birliyin fəaliyyətinə kömək edəcək və ekspert yardımı göstərəcək. GTZ Azərbaycanın fındıq bazarının marketinq araşdırmasını aparıb.

Fındığın istehsalı, saxlanması və daşınması ilə bağlı prosesin qiymətləndirilməsinə ehtiyac Azərbaycandan Avropa ölkələrinə fındıq ixracına qoyulan qadağa ilə bağlı yaranıb.

Bu qərarın verilməsində əsas səbəb fındığın tərkibində aflatoksinin aşkar olunması ilə bağlıdır ki, bu da daşınma və saxlanma şəraitinin pozulması ilə əlaqədardır.

Xəbər lenti

Xəbər lenti