Azərbaycan, Bakı / Trend müxbir S.Əliyev / Cümə günü ARDNŞ-dan verilən məlumata görə, Azərbaycan Respublikası Dövlət Neft Şirkəti "Xəzər- 4" özüqalxan qazma qurğusunun "Timan Oil and Gas PLS" şirkətinə icarəyə verilməsi ilə əlaqədar olaraq xüsusi komissiya yaradıb. Məqsəd Xəzərin Rusiya sektorunda "İzerbaş" müqavilə sahəsində yerləşən iki saylı blokda qazma işlərinin aparılmasıdır.
Əvvəllər "Timan Oil and Gas PLS" özüqalxan qazma qurğusunun icarə yolu ilə əldə edilməsinə dair ARDNŞ-la aparılan danışıqların başa çatdığını elan etmişdi.
"Timan Oil and Gas PLS"-in məlumatında bildirilir ki, ARDNŞ 80%-nin "Timan Oil and Gas PLS" şirkətinə məxsus olduğu "Geotermneftqaz" şirkətini qurğu ilə təmin etmək barədə qərarı təsdiqləyib. Qurğu şirkətə kəşfiyyat qazma işləri aparmaq məqsədilə lazımdır.
"Timan Oil and Gas PLS" Xəzər hövzəsinin Timan-Peçor regionunda əsas aktivlərə malik olan müstəqil kəşfiyyat və hasilat şirkətidir. "Timan" şirkəti Timan-Peçor regionunda iki yatağın əməliyyatçısıdır. Bu yataqlara "Nijneçutin" və "Xudael" yataqları aiddir. "Geotermneftqaz" şirkətində iştirak sayəsində Xəzər regionunda iki dəniz sttukturunun işlənməsi üzrə iki lisenziyaya malikdir. Bu yataqlara Dağıstan yaxınlığındakı "İzerbaş" və "Sulak" yataqları daxildir.
