Azərbaycan, Bakı, 24 yanvar/ " / Azərbaycan Dövlət Neft Şirkəti martda layihə dərinliyi təxminən 3 970 metr təşkil edən "Cəfərli" yatağında yeni quyunun qazılmasını başa çatdırmaq niyyətindədir. Bu barədə ARDNŞ-ın cümə axşamı yayılan məlumatında deyilir. Bu yataq "Muradxanlı" genişləndirilmiş mədəninin tərkibinə daxildir.
Yaxın vaxtlarda yataqda daha bir quyunun qazılmasına başlanılacaq. Ötən ilin sonunda sutkalıq debiti təxminən 40 ton təşkil edən yeni quyu istismara verilib.
2008-ci ildə neft hasilatının artırılması proqramı çərçivəsində "Muradxanlı" yatağında iki yeni quyu qazılıb. Yataqda layihə dərinliyi 2800 metr təşkil edən bir quyunun qazılması həyata keçirilir.
Mədənə daxil olan "Naftalan" yatağında müalicəvi neft hasil olunur. Bu gün orada gündəlik debiti 3-4 ton olmaqla 13 quyu istismar edilir.
2007-ci ildə mədənə daxil olan "Muradxanlı", "Cəfərli", "Naftalan", "Zərdabi" və "Tərsdəllər" yataqlarından 30,3 min ton neft hasil edilib. 2006-cı ildə bu rəqəm 26 min ton olub.
