Azərbaycan, Bakı, 25 yanvar / Trend , müxbir İ.Xəlilova / 2008-ci ilin əvvəlindən dünya bazarındakı vəziyyət Azərbaycanın Dövlət Neft Fonduna müsbət təsir göstərib. Belə ki, Fondun aktivləri səhmlərə deyil, qiymətli borc kağızlarına yatırılıb. Bu barədə cümə günü 2007-ci ildə ARDNF-nin fəaliyyətinin yekunlarına həsr edilmiş mətbuat konfransında Neft Fondunun icraçı direktoru Şahmar Mövsümov deyib.
Bütün qiymətli kağızlar bazarında kəskin eniş müşahidə olunur. Bu da "Dow Johns" indeksinin 6 faizdən artıq, digər ölkələrin birja indekslərinin 10-12 faiz düşməsi ilə əlaqədardır.
"Səhmlərin qiymətlərinin düşməsinə görə qiymətli borc kağızlarının sürətlə artdığından, ARDNF-nin dollarla yerləşdirilmiş portfelinin qiyməti dəyişilərək, 15 mln.$ artıb. Bununla əlaqədar, vəsaitlərin yerləşdirilməsi siyasətində portfelin valyuta tərkbində bəzi düzəlişlərdən başqa dəyişikliklər etməyi düşünmürük", - Mövsümov qeyd edib.
Ötən ilin yekununa əsasən, Neft Fondunun aktivlərinin 0,1 faizi (2,54 mln.$ ) səhmə yatırılıb. Suveren borc öhdəliklərinə aktivlərin 11,16 faizi (271,82 mln.$), beynəlxalq təşkilatların və agentliklərin istiqrazlarına - 26,52 faiz (646,32 mln.$), bank və maliyyə təşkilatlarının istiqrazlarına - 38,35 faiz (934,53 mln.$ ), korporativ istiqrazlara - 9,9 faiz (241,2 mln.$ ), ipoteka istiqrazlarına - 0,2 faiz (4,89 mln.$) yatırılıb.
