Azərbaycan, Bakı, 28 yanvar / Trend , müxbir S.Əliyev/ Azərbaycan Dövlət Neft Şirkəti (ARDNŞ) "Muradxanlı" yatağında üç ölçülü seysmik tədqiqarları başa çatdırmaq üzrədir. Bu barədə ARDNŞ-dan məlumat verilir. Bu işlər yataq üzrə məlumatların əldə olunması və qazma işlərinin genişləndirilməsi məqsədi ilə həyata keçirilir. Bütün işlər şirkətin Geofizika və Geologiya İdarəsi tərəfindən aparılır.
2007-ci ildə geniş "Muradxanlı" mədəninə daxil olan "Muradxanlı", "Cəfərli", "Naftalan", "Zərdabi" və "Tersdeller" yataqlarında 2006-cı ilin 26 min tonuna nisbətdə 30,3 min ton neft hasil edilib. ARDNŞ mart ayında "Cəfərli" yatağında layihə dərinliyi təxminən 3 970 metr olan yeni quyunun qazılmasını başa çatdırmaq niyyətindədir. Yaxın vaxtlarda yataqda daha bir quyunun qazılmasına başlanacaq.
"Muradxanlı" yatağında neft hasilatının artırılması proqramı çərçivəsində 2008-ci ildə iki yeni quyu qazılacaq. Hazırda yataqda layihə dərinliyi 2 800 metr təşkil edən bir quyunun qazılması həyata keçirilir.
Mədənə daxil olan "Naftalan" yatağında müalicəvi neft hasil edilir. Bu gün burada sutkalıq debiti 3-4 ton neft olan 13 quyu istismar olunur.