Azərbaycan, Bakı, 29 mart/ " , müxbir İ.Xəlilova/ CAREC proqramı çərçivəsində (CAREC - Mərkəzi Asiya regional iqtisadi əməkdaşlığı) aprelin 23-də Bakıda Energetika üzrə Komitənin iclası keçiriləcək. Bu barədə şənbə günü Asiya İnkişaf Bankının (AİB) Bakı nümayəndəliyindən məlumat veriblər.
Bu tədbirin hamisi Dünya Bankıdır. Bank Azərbaycanın sənaye və energetika naziri Natiq Əliyevə Komitədə sədrlik etmək üçün artıq dəvət göndərib.
DB və CAREC-ə üzv ölkələr iclasda öz energetika strategiyalarının təqdimatını keçirəcəklər. Onlar CAREC-də iştirak edən ölkələrin energetik əməkdaşlıq planını müzakirə edəcəklər. Planı 2008-ci il ərzində hazırlamaq planlaşdırılır.
Bir müddət əvvəl Bakıya səfər etmiş AİB-in regional əməkdaşlıq şöbəsinin direktoru Robert Siy bildirib ki, planın CAREC-in noyabrda Bakıda keçiriləcək nazirlər konfransında təsdiq edilməsi mümkündür. Energetika planı ötən il təsdiq edilən və $18 mlrd. qiymətləndirilən nəqliyyat dəhlizlərinin yaradılması proqramına bənzər olacaq.
Energetika proqramı çərçivəsində layihələrin maliyyələşdirilməsi CAREC-də iştirak edən altı beynəlxalq maliyyə institutunun - AİB, AYİB, BVF, İİB, BMT-nin İnkişaf Proqramı və Dünya Bankının hesabına həyata keçiriləcək.
Siy hesab edir ki, karbohidrogenlərin nəqli üzrə boru kəmərlərinin tikintisi də proqramın bir hissəsi ola bilər. O, CAREC-də iştirak edən yeddi ölkəni - Əfqanıstan, Azərbaycan, ÇXR, Qazaxıstan, Qırğızıstan Respublikası, Monqolustan, Tacikistan və Özbəkistanı əhatə edəcək. Buna baxmayaraq, siyahının genişləndirilməsi ehtimalı istisna edilmir. Belə ki, bu gün CAREC-də müşahidəçi statusuna malik Türkmənistan da nəqliyyat proqramında iştirak edir.
Müəlliflə əlaqə saxlamaq üçün elektron ünvan : [email protected]