Azərbaycan, Bakı, 23 may / Trend , müxbir S.Əliyev/ "Apsheron Operating LTD" əməliyyat Şirkəti "Hövsan-Zığ" müqavilə sahəsində 20 quyu qazmaq niyyətindədir. Bu haqda Azərbaycan Dövlət Neft Şirkətindən bildirilib.
Bu ilin oktyabrında "Hövsan-Zığ" müqavilə sahəsində neft hasilatına başlanacaq. Ötən il ərzində şirkət 17 min ton neft hasil edib.
Ötən ilin noyabrında Rusiyanın "RussNeft Absheron Investments Limited" şirkəti müqavilənin qüvvəyə minməsi ilə əlaqədar Zığ və Hövsan yataqlarının daxil olduğu blokun reabilitasiyası, işlənməsi və hasilatının bölüşdürülməsi üzrə saziş çərçivəsində Azərbaycan Dövlət Neft Fonduna $2 mln. bonus ödəyib.
2006-cı ilin noyabrında Rusiyanın "RussNeft"i Azərbaycan Dövlət Neft Şirkətilə "Hövsan-Zığ" yataqlarının işlənməsi və reabilitasiyası üzrə "PSA" tipli müqavilə imzalayıb. ARDNŞ-a müqavilə əsasında 25 faiz, "RussNeft"ə 75 faiz iştirak hissəsi düşüb. Müqaviləyə görə, şirkət iki ildən sonra "Hövsan-Zığ" yataqlarında neft hasilatını 1,5 dəfə artırmalıdır.
"Zığ" yatağının müqavilə sahəsi 65 kv.km təşkil edir. Hasil olunan neft qalıq ehtiyatları 12 mln. ton təşkil edir. Yataq 1932-ci ildə kəşf edilib. Sözügedən sahədə 234 quyu mövcuddur. Bunlardan 168-i müxtəlif vaxtlarda istismara verilib. "Hövsan" yatağı 1948-ci ildə kəşf edilib. Hasilat 19 quyuda aparılır.