Azərbaycanın Dövlət Neft Şirkəti (ARDNŞ) "İnam" perspektivli dəniz strukturunda qazma işləri nəticəsində əldə edilmiş məlumatların analizini aparmağı planlaşdırır. Bundan sonra, "yəqin ki, yeni quyunu strukturun hansı hissəsində qazılacağına dair qərar qəbul ediləcək",- ARDNŞ-nin geologiya, geofizika və yataqların işlənilməsi üzrə birinci vitse-prezidenti Xoşbəxt Yusifzadə Trend -a bildirib.
Xəzərin Azərbaycan sektorundakı "İnam" dəniz strukturunda kəşfiyyat xarakterli qazma işləri kommersiya məqsədli karbohidrogen ehtiyatı aşkar etməyib. "İnam" layihəsinin operatoru olan BP şirkəti bu sahədəki ikinci kəşfiyyat quyusunu ləğv edir. Şirkət quyunun qazılması zamanı, demək olar ki, layihə dərinliyinin5350 metrinə çatıb, lakin kommersiya məqsədli karobhidrogen ehtiyatları aşkar edilməyib.
Bu struktur üzrə PSA müqaviləsinin öhdəliklərinə görə, strukurda iki kəşfiyyat quyusu qazılmalıdır. 2001-ci ildə strukturda layihə dərinliyi 5025 metr olan birinci İNX-1 kəşfiyyat quyusunun qazılması aparılıb. Lakin quyuda qəza baş verib və bundan sonra o, bağlanıb. Bu quyu öhdəliklərin yerinə yetirilməsi kimi hesablanıb. Beləliklə, şirkətin bütün kəşfiyyat öhdəlikləri yerinə yetirilib. Quyu Bakıdan 140 kilometr məsafədə yerləşən və təqribən 225 kvadrat kilometr sahəni əhatə edən müqavilə sahəsində aparılıb. Müqavilə sahəsində suyun dərinliyi şimalda 45 metrdən cənubdə 200 metrədək dəyişir. "İnam bankası"nın minimal dərinliyi dörd metrdir.
"İnam" layihəsinin iştirakçıları ARDNŞ (50 faiz), BP (layihənin operatoru, 25 faiz), Koreya milli neft şirkəti (20 faiz) və Shell şirkətidir (5 faiz).
Müəlliflə əlaqə saxlamaq üçün elektron ünvan: [email protected]
