Azərbaycan, Bakı, 04 iyun / Trend , S.Əliyev/ Azərbaycanın sənaye və energetika naziri bu həftə Türkmənistana səfəri zamanı Xəzər dənizində birgə iş və paritet əsasda infrastrukturun istifadəsi məsələsini müzakirə edəcək.
"Biz qarşı tərəfi maraqlandıran bütün məsələlər üzrə danışıqlar aparmağa hazırıq", - deyə nazir Natiq Əliyev çərşənbə günü bildirib. Müzakirə olunacaq məsələlər arasında, o, həmçinin Türkmənistana üzən qazma qurğuların verilməsini də qeyd edib. Nazirin Aşqabada səfəri sabah başlayır.
Azərbaycan və Türkmənistan Xəzərin statusu ilə bağlı məsələni hələ ki, həll etməyiblər, bu da Bakının "Kəpəz" yatağında istismar işlərinə başlamasına mane olur. Sözügedən yatağın ehtiyatları çıxarılan neftlə birgə 50 mln. ton neft təşkil edir. Yataq SSRİ dövründə azərbaycanlı neftçilər tərəfindən kəşf edilib. Sözügedən yataq Azərbaycan və Türkmənistan arasındaki orta xəttdə yerləşdiyi üçün sovet dövründə "Aralıq" adlandırılırdı. "Kəpəz" yatağının işlənməsinə Amerikanın "Chevron" və Almaniyanın "Wintershall" şirkəti maraq göstərir.
