Azərbaycan, Bakı, 06 iyun / Trend / Azərbaycan Xəzər Neft Donanmasının "General Əliağa Şıxlinski" kran gəmisi və "İlqar Poluyev" gəmisi Xəzərin Türkmənistan sektorunda yerləşən "Livanova bankası" yatağında iki bloklu platformanın quraşdırma işlərini başa çatdırıb. Bu barədə Azərbaycan Dövlət Neft Şirkətinin (ARDNŞ) cümə günü yayılan məlumatında bildirilir.
Gəmi iki bloklu platformanın quraşdırılmasını dənizin 62 metr dərinliyində həyata keçirib. Hər bir blokun çəkisi 340 ton təşkil edir. Platformanı suyun dibinə möhkəmlətmək üçün "General Əliağa Şıxlinski" gəmisinin döşəməsindən platformanın "ayaqları"na 170 metrlik dirək vurulub.
"Livanova bankası" yatağı Sovet dönəmində azərbaycanlı geoloqlar tərəfindən kəşf edilib.
Azərbaycan və Türkmənistan arasında neft-qaz sahəsində əməkdaşlığın inkişafı hazırda Aşqabadda keçirilən beynəlxalq neft-qaz sərgisində müzakirə edilir. Tərəflər Azərbaycan və Türkmənistanın Xəzər dənizində birgə fəaliyyət məsələləri və ARDNŞ-ın infrastrukturlarından birgə istifadə məsələlərini müzakirə edirlər.
Həmçinin, Türkmənistanın Xəzərin bu ölkəyə aid hissəsində geoloji kəşfiyyat işlərinin aparılması üçün ARDNŞ-a məxsus üzən qazma qurğularından istifadə məsələsinin müzakirəsi planlaşdırılır.
