Azərbaycan, Bakı, 15 iyul/ Trend / 2007-ci ildə Azərbaycanın Dövlət Neft Şirkəti "Azneftyağ" neft emalı zavodu tərəfindən atmosferə zərərli maddələrin atılmasını 80 min ton azaldıb. Bundan əlavə, istehsal zamanı istifadə olunan, dənizə atılan suların tərkibində qalan neft məhsullarının miqdarı azaldılıb. Bu barədə Dövlət Neft Şirkətinin 2007-ci ilin yekunları üzrə hesabatında deyilir.
Azərbaycan Dövlət Neft Şirkətinin "Balaxanıneft" NQÇİ-nin ərazisində quyuların yeraltı və
əsaslı təmirini qapalı sistemə keçirmək üçün 8 30 kubmetrlik və və 2 25 kubmetrlik çən quraşdırılıb.
"Balaxanıneft" neft-qazçıxarma idarəsi üçün 158 ha sahənin rekultivasiya edilməsi məqsədilə layihə hazırlanıb. 3,8 ha ərazi neft məhsullarından təmizlənib.
"Bibiheybət" yatağı ərazisində lay sularının qapalı sistemdə axıdılması üçün 1500 m uzunluğunda dəmir-beton kanal çəkilib. Bundan əlavə, 2 ədəd 1000kubmetrlik çən quraşdırılıb, 300 mm-lik 800 m metal boru xətti korroziyaya davamlı plastik-şüşə borularla əvəz edilib. Yataqda 404 dor və neft qülləsi sökülüb.
"Bibiheybət"də müxtəlif növ tullantılarla çirklənmiş 405 ha torpağın monitorinqi aparılıb. 206,5 ha sahənin mexaniki rekultivasiyası aparılıb və hazırda bioloji təmizləmə işləri aparılır. Təmizləmə işlərini sürətləndirmək üçün məhsuldarlığı 15 t/saat olan mobil qurğu quraşdırılıb. Dənizdə yerləşən estakadalar, özüllər, mövcud kommunikasiya xətləri sökülür. Buxtanın akvatoriyasından ümumi çəkisi 2060 t olan batmış və yarıbatmış 10 gəminin qalıqları çıxarılıb.
Ə.Əmirov adına NQÇİ-də mədən ərazisinə axıdılan 800 kubmetr lay suyunun yeraltı horizontlara vurulması təşkil edilib.
H.Z. Tağıyev adına NQÇİ-də lay və təsərrüfat suları hesabına formalaşan Caparidze gölünün suyunu Hövsan kanalına axıtmaq üçün nasos stansiyası tikilib. Bunun üçün 2310 m uzunluğunda boru çəkilərək, göl qurudulub.
"Abşeronneft" NQÇİ-də yararsız hala düşmüş 2 çən yenisi ilə əvəz olunub.
Dübəndi neft terminalında nəql prosesində və çənlərin təmizlənməsi zamanı əmələ gələn dib çöküntülərinin zərərsizləşdirilməsi və təkrar emalı üçün bir ədəd şlam təmizləyici qurğu quraşdırılıb. Çənlərin çökən lay sularından təmizlənməsi üçün rayon neftvurma stansiyalarına 4 ədəd qurğu alınıb.