Azərbaycan, Bakı, 11 avqust / Trend , müxbir E.İsmayılov/ Havadan bombardımana məruz qalması səbəbindən fəaliyyəti dayandırılan Gürcüstanın Qara dəniz Poti limanının işi bu gün bərpa olunmayacaq. Bu barədə bazar ertəsi Trend telefonla Poti limanının marketinq və investisiyalar departamentinin rəhbəri Zviad Çxartişvili bildirib. Liman Rusiya təyyarələri tərəfindən Cənubi Osetiya münaqişəsi ilə bağlı bombalanıb.
"Limanın işi bu gün bərpa olunmayacaq, onun fəaliyyətinin bərpasına dair qərar sabah qəbul olunacaq", - deyə Çxartişvili vurğulayıb.
Əvvəllər limanın işinin bu gün günortadan sonra bərpa olunması nəzərdə tutulmuşdu. Çxartişvili yeni qərar barədə ətraflı məlumat verməyib.
Gürcüstanın Qara dəniz sahillərində yerləşən Poti limanı müxtəlif tipli yüklərin, o cümlədən Xəzərin şərq sahillərindən, Azərbaycan ərazisindən tranzit olunmaqla daşınan neft məhsullarının göndərilməsi ilə məşğul olur. Limanın neft terminalının gücü 9 mln. ton təşkil edir.
Limanın fəaliyyəti bazar günü axşam, Bakı vaxtı ilə təqribən saat 19:00-da dayandırılıb. Aparılan bombardıman nəticəsində liman kommunikasiyalarının enerji təchizatı sistemi sıradan çıxıb. Hazırda bütün sistemin işi bərpa olunub. Çxartişvili bildirib ki, bombardıman nəticəsində neft terminalı və dəmir yolu sıradan çıxmayıb.
Bir gün əvvəl Azərbaycan Dövlət Dəmir Yol İdarəsindən bildiriblər ki, Poti limanı ora göndərilən neft məhsullarını qəbul etmir. Azərbaycandan bu limana hərəkət edən qatarlar Gürcüstan ərazisindəki dəmir yolarında yerləşdirilir.
Məqalə müəllifi ilə əlaqə ünvanı - capital
