Azərbaycan, Bakı, 18 sentyabr/ TrendCap , müxbirlər E.İsmayılov, İ.Xəlilova/ Azərbaycanın Vergilər Nazirliyi 2008 - ci ilin sonunadək Azərbaycan Beynəlxalq Əməliyyat Şirkəti (ABƏŞ - "Azəri - Çıraq - Günəşli" yataqlarının işlənilməsi üzrə opertor) və onun tərkibinə daxil olan tərəfdaşlardan mənfəət vergisi üzrə daxilolmaların əhəmiyyətli dərəcədə artacağını gözləmir, vergilər nazirinin müavini Natiq Əmirov Trend - a bildirib. İlin əvvəlindən avqustun ortalarınadək bu xətt üzrə 1784 mln. manat daxil olub ki, bu da illik proqnoza bərabərdir.
Nazir müavininin sözlərinə görə, Azəri - Çıraq - Günəşli yataqlarının işlənilməsi layihəsində əcnəbi sərmayədarların kapital yatırımlarının tam ödənilməsi vaxtının başlaması ilə əlaqədar, sıfır balansa keçid vergi ödənişlərinin tədricən azalmasına səbəb olub.
Azərbaycanın Dövlət Neft Fondunun (ARDNF) icraçı direktoru Şahmar Mövsümov cümə axşamı "Azəri - Çıraq - Günəşli" blokunun işlənilməsinə dair PSA tipli müqavilə üzrə sıfır balansa keçid tarixinin başladığını təsdiqləyib.
Onun sözlərinə görə, hazırda ABƏŞ -in aktivlərinin Azərbaycan dövlətinin balansına verilməsi məsələsi nəzərdən keçirilir və bununla əlaqədar, ARDNF, Azərbaycan Dövlət Neft Şirkəti və ABƏŞ -in nümayəndələrindən ibarət işçi qrupu yaradılıb.
"Bu qurumlar arasında aktivlərin dövlət balansına verilməsi forması və bundan sonrakı fəaliyyət sxemi üzrə danışıqlar gedir", - Mövsümov bildirib.
2008-ci ilin birinci rübünün yekunları üzrə ABƏŞ-in xətti ilə dövlət büdcəsinə 555 mln. manat, ikinci rübdə isə 486,9 mln. manat mənfəət vergisi daxil olub. Ümumilikdə bu xətt üzrə dövlət büdcəsinə 1296,9 mln. manat vəsaitin (IV rübə görə avans nəzərə alınmaqla) ödənilməsi təmin edilib.
Neftin qiymətinin 50 doll/barel olması nəzərə alınmaqla 2007-ci ildə onların vergi daxilolmaları 1,5 mlrd. manat məbləğində müəyyən edilsə də, 2,5 mlrd. manatı ötüb. Bu, il ərzində neftin qiymətinin iki dəfə artması və bütün neft markalarının qiymətinin $82-85 civarında, cari ildə isə $105 səviyyəsində qalması ilə bağlı olub.
2008-ci ildə ABƏŞ-dən mənfəət vergisi üzrə daxilolmaları 1,55 mlrd. manat səviyyəsində proqnozlaşdırılıb, Maliyyə Nazirliyinin gözləmələri isə 1,75-1,8 mlrd. manat səviyyəsində olub. Dünya neft qiymətləri konyukturası neft şirkətlərindən dövlət büdcəsinə daxilolmaların artmasına, həmçinin dövlət və xarici şirkətlər arasında neftdən gələn gəlirlərin bölünməsinə təsir göstərir.
Hökumətin büdcə proqnozlarını formalaşdırarkən neftin qiymətini 50 doll/bareldən 70 doll/barelədək dəyişməsi də dövlət büdcəsinə ödənişlərin artmasına təsir göstərir. Neft şirkətləri bu qiymətə əsasən hesablama aparmaqla, dövlət büdcəsinə vergi ödənişlərini 2008 - ci ilin ikinci və üçüncü rübündə həyata keçirərək, dördüncü rüb ərzində daxilolmaları növbəti ilə keçirirlər.
Sentyabrın 18 - nə olan cari mübadilə məzənnəsi -- 0,8126 AZN/USD
Müəlliflə əlaqə saxlamaq üçün elektron ünvan: [email protected]