Azərbaycan, Bakı, 13 noyabr/ Trend / Cari ilin dekabr ayında "Tengizchevroil" şirkəti Bakı-Tbilisi-Ceyhan (BTC) boru kəməri ilə 2,4 mln. barel neft nəql edəcək. Bu barədə Energy Intelligence Group Inc. yazır. Neft dörd partiya ilə göndəriləcək.
Müqavilənin şərtlərinə görə, Tengiz nefti BTC və dəmir yolu vasitəsilə Gürcüstanın Kulevi və Batumi limanlarına nəql olunacaq. Sazişin şərtlərinə əsasən, nəql edilən həcm bərabər paylara bölünəcək.
Qazaxıstandan neft tankerlə Bakya çatdırılır, buradan Bakı-Tbilisi-Ceyhan boru kəmərinə vurulur və ya dəmir yolu vasitəsilə Gürcüstanın Qara dəniz terminallarına göndərilir.
"ChevronTexaco" Qazaxıstanın "Tengiz" yatağının operatorudur. Müqavilə sahəsinin istifadəsi ilə Tengizchevroil əməliyyat şirkəti məşğul olur.
BTC neft kəmərinin ümumi uzunluğu 1768 km-dır. Boru kəmərinin 443 km-i Azərbaycan, 249 km-i Gürcüstan; 1076 km-i isə Türkiyə ərazisindən keçir.
"BTC Co"nun səhmdarları: BP (30,1 faiz); "AzBTC" (25 faiz); "Chevron" (8,9 faiz); "StatoilHydro" (8,71 faiz); "TRAO" (6,53 faiz); "Eni" (5 faiz); "Total" (5 faiz); "Itochu" (3,40 faiz); "Inpex" (2,5 faiz); "ConocoPhillips" (2,50 faiz) və "Hess" (2,36 faiz).
Gürcüstanın Qara dəniz Kulevi terminalının sahibi Azərbaycanın SOCAR şirkəti, Batumi terminalının sahibi isə Qazaxıstanın "KazMunayqaz" şirkətidir.
