Gürcüstan, Tbilisi, 01 dekabr/ Trend , müxbir N.Kirtsxaliya / Çərşənbə axşamı Gürcüstan hökuməti və Birləşmiş Ərəb Əmirliklərinin RAK Investment Authority şirkətilə Gürcüstanın Poti Qara dəniz lmanına 65 mln. dollar məbləğində əlavə sərmayənin gerçəkləşdirilməsi barədə razılaşma imzalayıblar.
Sənədi Gürcüstanın iqtisadi inkişaf naziri Yekaterina Şaraşidze və şirkətin baş direktoru Hater Masaad imzalayıb.
"Gürcüstana əcnəbi sərmayələrin daxil olması davam edir. Bu, yeni iş yerlərinin yaradılması deməkdir", - müştərək keçirilən mətbuat konfransında iqtisadi qurumun rəhbəri deyib: "Dünya böhranı yaşansa da, RAK Investment Authority Poti limanına əlavə 65 mln. dollar sərmayə qoyacaq".
Şaraşidzenin sözlərinə görə, 2008 -ci ildə bu limanın əsasının qoyulmasının 150 ili tamam olur. Yeni limanın tikintisilə yanaşı, sərbəst sənaye zonası da fəaliyyətə başlayacaq.
Üç yüz hektar ərazisini əhatə edəcək sərbəst sənaye zonasına beş il ərzində 200 mln. dollardan çox sərmayə qoyuluşu planlaşdırılıb, burada 450 müəssisənin tikilməsi və əlavə 20 000 iş yerinin açılması da nəzərdə tutulub.
Masaad qeyd edib ki, onun şirkəti son üç il ərzində Gürcüstana xeyli sərmayə qoyub və bu fəaliyyət gələcəkdə də davam edəcək.
Müəlliflə əlaqə ünvanı: [email protected]