Azərbaycan, Bakı, 05 fevral/ Trend / Dünyada poladın qiyməti düşəcəyi təqdirdə, "Nabukko" qaz kəməri tikintisinin dəyəri azaldıla bilər. Bu barədə Nabucco Gas Pipeline International-ın idarəçi direktoru Reynxard Mitçek Ankarada keçirilən konfransda bildirib. Bu barədə Energy Intelligence Group xəbər verir. Layihənin hazırkı dəyəri 7,9 mlrd avro (10,1 mlrd. dollar) qiymətləndirilir.
Fevralın 3-də London metal birjasında (LME) polad tədarükü üzrə rəsmi qiymətlər "Aralıq dənizi" üzrə dərhal göndərilmə ilə bir ton üçün 351 dollar və üç aydan sonra göndərilmə ilə bir ton üçün 331 dollar təşkil edib. "Uzaq şərq" tədarükü üzrə dərhal göndərilmə ilə bir ton üçün qiymət 295 dollar və üç aydan sonra göndərilmə ilə bir ton üçün 300 dollar təşkil edib.
World Steel Association beynəlxalq elmi-texniki təşkilatın məlumatlarına görə, ötən ilin yekunu üzrə dünyada polad istehsalı son 11 ildə ilk dəfə olaraq azalıb və 1mlrd. 329,7 mln. ton təşkil edib.
Mitçekin sözlərinə görə, qaz kəmərinin başlanğıc nöqtəsi həm Ankara, həm də Türkiyənin Gürcüstan və İran ilə sərhədi ola bilər.
"Nabukko" qaz kəmərinin tikintisinə 2011-ci ildə başlamaq nəzərdə tutulub. Boru kəməri ilə ilk tədarüklər 2014-cü ildə başlanacaq. Boru kəmərinin maksimal ötürmə gücü ildə 31 mlrd. kubmetr olacaq. Layihənin iştirakçıları OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botas və Almaniyanın RWE şirkətləridir. Onların hər biri bərabər paya - 16,67 faiz paya malikdir.
