Azərbaycan, Bakı, 07 fevral / Trend / Rusiyanın qaz inhisarçısı "Qazprom" tərəfindən "Mazdok-Qazməmməd magistral qaz kəmərinin texniki vəziyyətinin proqnoz və təhlili" üzrə elan olunan tenderin qalibi "Diaqnostika, ekologiya və informasiya təminatı" MMC olub. Bu barədə "Qazprom"un rəsmi saytında yerləşdirilən məlumatda bildirilir.
Məlumatda deyilir ki, "Qazprom transqaz Mahaçqala" MMC-nin müsabiqə komissiyasının qərarına əsasən, "Diaqnostika, ekologiya və informasiya təminatı" MMC tenderin qalibi elan olunub.
"Qazprom" ötən ilin sonu-cari ilin əvvəlində üç tender elan edib - "Mazdok-Qazməmməd magistral qaz kəmərinin geotexniki diaqnostikası", "Ümumi uzunluğu 31 km.olan Mazdok-Qazməmməd MQK-da izolyasiya örtüklərinin əsaslı təmiri prosesində boruların zədəli yerlərinin ayrılması" və "Magistral qaz kəmərlərinin (Mazdok-Qazməmməd) texniki vəziyyətinin proqnoz və təhlili".
"Qazprom"un rəsmi saytında yerləşdirilən məlumatda bildirilir ki, bu işlər "Qazprom transqaz Mahaçqala" MMC-nin şəxsi vəsaitləri hesabına maliyyələşdiriləcək.
Əvvəllər "Qazprom transqaz Mahaçqala" MMC-nin müsabiqə komissiyasının qərarı ilə "Mazdok-Qazməmməd magistral qaz kəmərinin geotexniki diaqnostikası" üzrə tenderdə müsabiqəyə yalnız bir ərizə təqdim olunması səbəbindən, tender baş tutmamış elan olunmuşdu.
Layihə gücü ildə 10 mlrd. kubmetr olan bu qaz kəməri üzrə əvvəllər Rusiyadan Azərbaycana təbii qaz tədarükü həyata keçirilirdi. Lakin 2007-ci ildə Azərbaycan RF-dən "təbii qaz" alınmasını dayandırıb.
Ötən il dekabr ayının sonunda Rusiyanın "Qazprom" şirkəti ilə Azərbaycanın SOCAR şirkəti (Azərbaycan Dövlət Neft Şirkəti) arasında Azərbaycan qazının Rusiyaya tədarük məsələsi üzrə danışıqlar aparılıb.
"Qazprom" "Şahdəniz" yatağının işlənməsi layihəsində "Mərhələ-2" çərçivəsində bütün ixrac həcmini almaq niyyətindədir. SOCAR-ın şəxsi yataqlardan hasil etdiyi qazın tədarük məsələsi qısa müddətli perspektivdə nəzərdən keçirilir. Xüsusilə, Azərbaycan qazının Dağıstana tədarükü məsələsinə baxılır.
Bu il ərzində SOCAR şəxsi yataqlarından təqribən 8 mlrd. kubmetr qaz hasil edəcək.