Azərbaycan, Bakı, 27 may / Trend , müxbir E.İsmayılov /
Azərbaycanın Sənaye və Energetika Nazirliyi nəzdində fəaliyyət göstərən Dövlət Qaz Nəzarəti İdarəsi ölkənin İnzibati Məcəlləsinə daxil edilmiş qaz, istilik və elektrik enerjisi sahəsində qanunvericilik tələblərinin pozulması üçün cərimələrin tətbiq edilməsinə başlayıb, çərşənbə günü idarənin rəhbəri Asif Zeynalov bildirib.
"Daxil edilmiş dəyişikliklər artıq tətbiq edilməyə başlanıb. Artıq ölkə üzrə 20-25 qaz istismarı idarəsinə cərimə tətbiq edilib. Bu yalnız bizim cərimə tətbiq etdiyimiz idarələrdir, lakin bəzi idarələrə mövcud qanun pozuntularını həll etmək üçün vaxt vermişik", - Zeynalov bildirib.
Zeynalovun dediyinə görə, hələ ki bu dəyişikliklər əsasən qanun pozuntularına görə böyük məsuliyyət daşımayan qaz istismarı idarələrinə tətbiq edilir. Əhali və özəl sektora bu dəyişikliklər az dərəcədə tətbiq edilir, lakin orada hər şey nəzarət altındadır.
İdarə ilk mərhələdə istifadəçiyə və qaz istismarı idarələrinə mövcud qanun pozuntularını həll etmək üçün imkan və vaxt verərək, onların qaz və qaz təsərrüfatı ilə bağlı qanun pozuntularını qeyri-sərt tədbirlər - xəbərdarlıq və bildirişlər vasitəsilə həll etməyə çalışır. "Biz onlara öz işlərini qaydaya salmaq üçün imkan veririk. Cərimələr yalnız qaz istifadəsi ilə bağlı böyük qanun pozuntuları zamanı tətbiq edilir", - Zeynalov bildirib.
Mövcud problemləri yalnız cərimələrin yazılması ilə həll etmək mümkün deyil. İstifadəçilər qanun pozuntularına görə daşıdıqları məsuliyyəti anlamalıdırlar, Zeynalov deyib.
Zeynalovun fikrincə, cərimələrin artırılması müsbət nəticə verəcək və qaz istifadəsi sahəsində qanun pozuntularının azalmasına səbəb olacaq.
Bir müddət əvvəl, ölkə parlamenti Azərbaycanın İnzibati Məcəlləsinin 116-cı maddəsində (Qaz, istilik və elektrik enerjisi sahəsində qanunvericilik tələblərinin pozulması) edilmiş dəyişiklikləri təsdiq edib. Əgər əvvəllər maddə istilik və elektrik enerjisi sahəsində cərimə nəzərdə tuturdusa, edilmiş dəyişikliklərdən sonra bu cərimələr qaz istifadəsi sferasına da tətbiq ediləcək. Həmçinin dəyişikliklərə müvafiq olaraq bu sahələrdə qanun pozuntularına görə cərimələr əhəmiyyətli dərəcədə artıb.
Qaz, istilik və elejtrik enerjisi sahəsində edilmiş inzibati pozuntulara uyğun olaraq, fiziki şəxslər üçün 200 manatdan 500 manata, vəzifəli şəxslər üçün 1000-1500 manat, hüquqi şəxsalər üçün 2500-3000 manat məbləğində cərimə nəzərdə tutulur.
Bu maddənin əsas xüsusiyyəti odur ki, bu sahədə nəzərdə tutulmuş inzibati qanun pozuntuları və pozuntular üçün qadağalar istifadəçilərdən başqa həm də qaz sahəsində çalışan hüquqi və vəzifəli şəxslərə aid edilir. Maddə qaz təsərrüfatı elementlərinin tikilməsi, istismara verilməsi və layihələşdirilmə prosesi zamanı edilmiş qanun pozuntularına görə cərimələri nəzərdə tutur. Cərimələr, həmçinin qazın dövlət və sahəvi standartlarının pozulması üçün də nəzərdə tutulur. Bu, gələcəkdə qazın keyfiyyətinin artırılması üçün vacib şərtdir. Dövlət Qaz Nəzarəti İdarəsi bu sferada öz nəzarətini gücləndirmək niyyətindədir.
Məqalə müəllifi ilə əlaqə: [email protected]
