Azərbaycan, Lənkəran, 29 may / Trend , müxbir P.Əliyeva /
"Bakıda, iyunun 2-5-i arasında keçiriləcək Caspian Oil and Gas 2009 sərgi və konfransının gedişində Azərbaycan və Türkiyə nümayəndələri arasında baş tutacaq danışıqlar çərçivəsində, Azərbaycan qazının Türkiyəyə ixrac qiymətinin artırılması üzrə razılıq əldə edilməsi planlaşdırılır", - cümə günü bu ölkənin Azərbaycandakı səfiri Hülusi Kılıç deyib.
Azərbaycan öz qazının Türkiyəyə ixrac qiymətini "Şahdəniz" yatağının işlənilməsinin birinci mərhələsi çərçivəsində artırmaq niyyətindədir. Bu gün Azərbaycan qazı Türkiyəyə 1000 kubmetri 120 dollara satılır. Ancaq bu qiymət 2001-ci ildə bağlanmış müqavilədə göstərilən qiymətdir.
Türkiyə ilə bağlanmış müqaviləyə əsasən, "Şahdəniz" yatağından çıxarılan qazın qiymətinə tədarüklərin başlanğıcından bir il sonra yenidən baxıla bilər. Hazırda bu məsələ ilə bağlı danışıqlar aparılır.
Müqaviləyə əsasən, Türkiyə Azərbaycanın "Şahdəniz" yatağından ildə 6,6 milyard kubmetr qaz almalıdır.
"Şahdəniz" yatağının işlənməsi layihəsi 4 iyun 1996-cı ildə imzalanıb. "Şahdəniz" yatağının ümumi ehtiyatları 1,2 trln. kubmetr qaz həcmində qiymətləndirilir. "Şahdəniz" layihəsində hasilatın pay bölgüsünə dair Sazişin iştirakçıları: BP (operator) -25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, SOCAR - 10 faiz.
Məqalə müəllifi ilə əlaqə ünvanı: [email protected]
