Azərbaycan, Bakı, 04 iyun / Trend , müxbir E.İsmayılov /
Xəzərin Azərbaycan sektorundakı "Şah Dəniz" qaz-kondensat dəniz yatağında hasilatın artırılması üçün əlavə platformaların tikilməsi dərin sulardakı avadanlıqdan istifadə etməklə hasilat həyata keçirilməsinə nisbətən daha təhlükəsiz olacaq. Bu barədə cümə axşamı SOCAR şirkətinin (Azərbaycan Dövlət Neft Şirkəti) geologiya, geofizika və yataqların işlənməsi üzrə birinci vitse-prezidenti Xoşbəxt Yusifzadə bildirib.
"İkinci platforma tikiləcək, lakin BP-nin qazıma işləri və sualtı üsul ilə platformalara birləşdirmə işlərinin aparılması ilə bağlı ideyaları mövcuddur. Bu halda platformaların sayı az olacaq", - Yusifzadə bildirib.
Onun fikrincə, "Şah Dəniz" yatağının çox dərində yerləşdiyini nəzərə alsaq, orada sualtı üsul ilə işləmə işləri aparmaq çətindir. Yusifzadə yataqda üçüncü platformanın tikintisini əlverişli hesab edir. Baxmayaraq ki, bu, sualtı üsulla müqayisədə çox xərc tələb edir, lakin daha təhlükəsiz hesab olunur.
"Şahdəniz" yatağının işlənməsinə dair müqavilə 1996-cı il iyunun 4-də imzlanıb. Layihə iştirakçıları bunlardır: BP (operator) -25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, SOCAR - 10 faiz.
Hazırda qaz Cənub Qafqaz qaz kəməri vasitəsilə Gürcüstan və Türkiyəyə nəql olunur. Azərbaycan da bu qazın alıcısı qismində çıxış edir. Bu il ərzində yatağın işlənməsi üzrə birinci mərhələ çərçivəsində ildə 8,6 mlrd. kubmetr qazın hasil edilməsi nəzərdə tutulub. Reallaşdırılmasına 2014-cü ildə başlanacaq "Şah Dəniz" yatağının ikinci mərhələsi çərçivəsində yataqda ümumi hasilat 20 mlrd. kubmetrə çatdırılacaq.
Məqalə müəllifi ilə əlaqə ünvanı: [email protected]