Gürcüstan, Tbilisi, 08 iyul / Trend , müxbur N.Kirsxaliya /
Gürcüstanın dəmiryolunda daşınmalarla bağlı vəziyyət yaxşılaşmağa başlayıb. Gürcüstan Dəmiryol daşınma departamentinin rəhbəri David Cincoliyanın dediyinə görə, son zamanlar durum yaxşılamağa başlayıb, ancaq istənilən nəticəyə nail olmağa hələ çox var.
"Vəziyyət bir az yaxşılaşıb, ancaq hələ görüləsi çox iş var. ABŞ-ın "Chevron" və "ExxonMobil" şirkətlərinə gəlincə, bu iki şirkət daşınmaları davam etdirirlər, ancaq etiraz aksiyalarına qədər olan həcmə nail olmaq hələ ki mümkün deyil", - Cincoliya bildirib.
ABŞ şirkətləri neft və neft məhsullarının daşınmasını həyata keçirir. "ExxonMobil" "Azəri-Çıraq-Günəşli" yataqlar blokundan əldə olunan nefti Gürcüstanın Batumi Qara dəniz limanına nəql edir. "Chevron" Batumiyə Azərbaycan ərazisindən tranzit olaraq Qazaxıstanın "Tengiz" yatağından əldə olunan nefti daşıyır.
Xatırladaq ki, bir müddət əvvəl Gürcüstanın dəmiryol rəhbərliyi bildirib ki, müxalifətin etiraz aksiyalarına başlamasından sonra yükdaşımalar 35 faiz azalıb.
Məqalə müəllifi ilə əlaqə ünvanı: [email protected]
