Azərbaycan, Bakı, 05 avqust / Trend , müxbir E. İsmayılov /
ARDNŞ (Azərbaycan Dövlət Neft Şirkəti) operatoru əcnəbi iştirakla Salyan Oil olan "Kürsəngi" yatağının şimal hissəsinin hidrodinamik modelinin qurulmasına başlayıb. Bu barədə çərşənbə günü ARDNŞ-dəki mənbə məlumat verib.
"Müqavilə çərçivəsində artıq hidrodinamik modelin qurulması işinə başlanılıb. Bu da layihənin sonuncu mərhələsidir", - mənbə deyib.
Mənbənin dediyi kimi, hazırda bu müqavilə çərçivəsində işlər intensiv aparılır və sentyab-oktyabrda işlərin tamamilə başa çatdırılması gözlənilir. Görülən işlər çərçivəsində quyular və verilən hasilat barədə məlumatlar dəqiqləşəcək, nəticədə isə mərkəzə perspektiv qazma və yatağın işlənilməsi planı veriləcək.
Bir müddət əvvəl mərkəz "Kürsəngi" yatağının cənub hissəsinin modelləşdirilməsi işini başa çatdırıb. Modelləşdirmə mərkəzi yeni quyuların təməlinin coğrafi mövqeyi üzrə proqnozlarını təqdim edib. Ümumilikdə müqavilə ərazisində 80-dən çox quyu qazılıb. Yatağın ehtiyatının yenidən qiymətləndirilməsi 18 milyon tona bərabər olan ilkin proqnozdan az fərqli olub.
"Kürsəngi-Qarabağlı" müqavilə ərazisini işləyən Salyan Oil şirkəti 2009-cu ildə yataqlarda dörd istismar quyusu qazımağı planlaşdırır.
Yataqlar Azərbaycanın Salyan rayonunda yerləşir (Bakıdan 150 km-lik məsafədə). ARDNŞ mütəxəssislərinin fikrincə, müqavilə ərazisində qalan neft ehtiyatı 152 milyon tondur.
"Kürsəngi-Qarabağlı" quru yatağının işlənməsi üzrə müqavilənin müddəti 25 ildir. Layihənin səhmdarları bunlardır: ARDNŞ - 50 faiz, 25 faizə malik iki Çin şirkəti - China National Oil & Gas Exploration and Development Corp. (CNODC) və CNPC (Hong Kong) Ltd. (CNPCHK).
Məqalə müəllifi ilə əlaqə ünvanı: [email protected]
