Azərbaycan, Bakı, 20 avqust / Trend , müxbir E.İsmayılov /
"Gulf Drilling Supply FZE" şirkəti (Birləşmiş Ərəb Əmirlikləri) bir ay ərzində "Surahani oil" şirkətinin işlədiyi "Suraxanı" quru yatağında neft quyularının qazılmasını başa çatdırmağı planlaşdırır. Bu barədə cümə axşamı qazma şirkətinin Azərbaycan nümayəndəliyinin rəhbəri İlham Babayev məlumat verib.
"Qazma işləri bizim tərəfimizdən aparılır və quyuların bir aydan sonra sifarişçilərə təhvil verilməsi planlaşdırılır", - deyə Babayev əlavə edib.
Babayevin dediyinə görə, şirkət layihəyə daxil olan 2550 metrdən 1600 metr qazıb. Bu, şirkətin "Suraxanı" yatağında qazdığı ikinci quyudur.
Şirkət qazma işlərində maksimal qazma dərinliyi 3000 metrə çatan, Çin istehsalı olan ZJ-30 qurğusundan istifadə edir.
Babayevin sözlərinə görə, hazırda şirkət Azərbaycanın hüdudlarından kənarda da iş görmək üçün danışıqlar aparır. "Hazırda hər şey danışıqlar mərhələsindədir. Xarici layihələrdə iştirak neftin qiyməti sabitləşəndən sonra reallaşacaq", - o bildirib.
Ötən il şirkət avadanlığın alınmasına təxminən 15 milyon dollar xərcləyib. Bu avadanlıqlara qazma qurğuları, quyuların təmiri üçün lazım olan avadanlıq və quyularda neftayırmanın intensivliyini artırmaq üçün texnologiyalar aiddir.
Məqalə müəllifi ilə əlaqə ünvanı: [email protected]
